Ti Naimbag a Damag a Kayatda a Mangngeganyo
IDI adda ditoy daga ni Jesus, immasideg kenkuana dagiti adalanna ket inimtuodda: “Anianto ti pagilasinan ti kaaddam ken ti panungpalan ti sistema ti bambanag?” Insungbatna nga addanto gubgubat a pakairamanan ti adu a nasion, bisin, angol, ginggined, ilalanlan ti kinakillo, ulbod a mannursuro a mangyaw-awan kadagiti adu, pananggura ken panangidadanes kadagiti pudno a pasurotna, ken ti ilalamiis ti ayat dagiti adu a tattao iti kinalinteg. No mangrugin a mapasamak dagitoy, ipasimudaagna ti di makita a kaadda ni Kristo ken asidegen ti iyaay ti nailangitan a Pagarian. Maysa a damag daytoy—naimbag a damag! Isu nga innayon ni Jesus dagitoy a sasao a kas paset ti pagilasinan: “Daytoy naimbag a damag ti pagarian maikaskasabanto iti intero a mapagnaedan a daga maipaay a pangsaksi kadagiti amin a nasion; ket iti kasta umayton ti panungpalan.”—Mateo 24:3-14.
Dakes dagiti mismo a pasamak ditoy lubong iti nabiit pay, ngem nasayaat ti ipatpatuldoda—ti kaadda ni Kristo. Nangrugi a makita dagiti kasasaad a nadakamat iti ngato iti daydi nagdindinamag a tawen 1914! Minarkaanna ti panagpatingga ti Panawen Dagiti Gentil ken panangrugi ti tiempo ti panagbalbaliw manipud natauan a turay nga agturong iti Sangaribu a Tawen (Milenio) a Panagturay ni Kristo.
Ipasimudaag ti maika-110 a Salmo, bersikulo 1 ken 2, ken Apocalipsis 12:7-12 nga adda tiempo ti panagbalbaliw. Naipakita sadiay nga agtugaw ni Kristo iti makannawan ti Dios idiay langit agingga iti tiempo nga agbalin nga Ari. Kalpasanna, ti gubat idiay langit agbanag iti pannakaitapuak ni Satanas ditoy daga, a mangibunga iti ay-ay ditoy daga, ken agturay ni Kristo iti tengnga dagiti kabusorna. Agpatingganto a naan-anay ti kinadakes babaen ti “dakkel a rigat,” nga agngudo iti gubat ti Har–Magedon ken sarunuen ti natalna a Sangaribu a Tawen a Panagturay ni Kristo.—Mateo 24:21, 33, 34; Apocalipsis 16:14-16.
“Ngem ammuem daytoy,” kuna ti Biblia, “a kadagiti maudi nga aldaw dumtengto dagiti napeggad a tiempo a narigat a pakilangenan. Ta dagiti tattao managayatdanto iti bagbagida, managayat iti kuarta, napalangguad, natangsit, managtabbaaw, nasukir kadagiti nagannak, saan a managyaman, saan a nasungdo, awanan nainkasigudan a panagayat, saan a sidadaan iti aniaman a tulagan, manangparpardaya, awanan panagteppel, narungsot, awanan panagayat iti kinaimbag, mangliliput, natangken ti uloda, natangsit gapu iti panagpannakkel, managayat iti ragragsak imbes a managayat iti Dios, nga addaanda iti langa ti nadiosan a debosion ngem libakenda ti pannakabalin dayta; ket umadayoka kadagitoy.”—2 Timoteo 3:1-5.
Nalabit irason ti dadduma a napasamak idin dagitoy a banag iti pakasaritaan ti tao, ngem iti kinapudnona nakarkaro dagita ngem iti napalabas. Kas kuna dagiti historiador ken komentarista, awan pay a pulos ti tiempo ditoy daga a kas iti napasaran nanipud 1914 nga agpatpatuloy. (Kitaenyo ti panid 7.) Adayo a nakarkaro itan dagiti didigra ngem idi. Mainayon pay, kas iti dadduma a paset ti pagilasinan ni Kristo iti maudi nga al-aldaw, masapul met nga utobentayo dagitoy a kinapudno: Ti sangalubongan a pannakairakurak ti kaadda ni Kristo ken ti Pagarian ket awan ti kaasping ti kasaknapna iti historia. Awan ti umartap iti pannakaidadanes a napasaran dagiti Saksi ni Jehova gapu iti panangasabada. Ginasgasut kadakuada ti napapatay kadagiti kampo konsentrasion dagiti Nazi. Agingga ita, maparparitan dagiti Saksi ni Jehova iti sumagmamano a lugar, ket iti dadduma a lugar maar-aresto, maibalbalud, maparparigat, ken mapappapatayda. Paset amin dagitoy ti pagilasin nga inted ni Jesus.
Kas naipadto iti Apocalipsis 11:18, “nagpungtot dagiti nasion” maibusor kadagiti matalek a Saksi ni Jehova, ket daytoy ti mangipasimudaag nga iyebkasto ni Jehova ti ‘bukodna a pungtot’ maibusor kadagita a nasion. Ibaga ti isu met laeng a kasuratan a ti Dios ‘dadaelennanto dagidiay mangdaddadael iti daga.’ Pulos a di pay napasamak iti pakasaritaan ti tao a ti kabaelan ti daga a mangsustiner iti biag ket agpegpeggaden. Ngem naiduma itan! Namakdaar ti adu a sientista a no itultuloy ti tao a sabidongan ti daga, saanton a mabalin a pagnaedan. Ngem, ‘binukel dayta [ni Jehova] tapno mapagnaedan,’ ket ikkatenna dagidiay mangrugrugit sakbay a madadaelda a naan-anay ti daga.—Isaias 45:18.
DAGITI BENDISION DITOY DAGA ITI SIDONG TI PAGARIAN
Ti panangpanunot nga adda tattao nga agbiag ditoy daga a kas iturayan ti Pagarian ti Dios ket kasla karkarna iti adu a mamati iti Biblia a mangipagarup nga amin dagidiay maisalakan ket mapanda idiay langit. Ipakita ti Biblia a limitado laeng ti bilang dagidiay mapan idiay langit ken dakkel a bunggoy a di nakedngan ti bilangda ti agbiagto nga agnanayon ditoy daga. (Salmo 37:11, 29; Apocalipsis 7:9; 14:1-5) Ipakita ti padto ti Biblia iti libro a Daniel a ti Pagarian ti Dios iti sidong ni Kristo punnuennanto ti daga ken iturayanna dayta.
Nailadawan sadiay ti Pagarian ni Kristo a kas bato a natikap manipud iti kasla bantay a kinasoberano ni Jehova. Kabilen ken dadaelenna ti ladawan a mangirepresentar kadagiti nabileg a nasion ditoy daga, ket ti “bato a nangkabil iti ladawan . . . nagbalin a dakkel a bantay ket pinunnona ti intero a daga.” Ituloy a kunaen ti padto: “Ket iti kaaldawan dagidiay nga ar-ari mangipasdekto ti Dios ti langit iti maysa a pagarian a saanto a pulos madadael. Ket ti met laeng pagarian saanto a mayawat iti aniaman a sabali nga ili. Rumekennanto ken pagpatinggaenna amin dagitoy a pagarian, ket dayta agtalinaedto agingga kadagiti tiempo a di nakedngan.”—Daniel 2:34, 35, 44.
Daytoy a Pagarian ken ti Nainkasuratan a namnama a biag nga agnanayon iti nadalusan ken napapintas a daga ti kayat nga ipakaammo kadakayo dagiti Saksi ni Jehova. Minilion a sibibiag ita, ken minilmilion nga adda ita kadagiti tanemda, ti addaan iti gundaway nga agnaedto sadiay iti agnanayon. Kalpasanna, iti sidong ti Sangaribu a Tawen a Panagturay ni Kristo Jesus, matungpalton ti orihinal a panggep ni Jehova no apay a pinarsuana ti daga ken inkabilna iti dayta ti immuna a pagassawaan. Pulos a dinto makapasikor daytoy naindagaan a Paraiso. No kasano a naipaayan ni Adan iti trabaho idiay minuyongan ti Eden, addanto met dagiti makapagagar a proyekto ti sangatauan iti panangaywanda iti daga ken mulmula ken an-animal nga adda iti dayta. “Napautto ti panangtagiragsakda iti gapuanan ti im-imada.”—Isaias 65:22, Revised Standard Version; Genesis 2:15.
Adu ti maiparangtayo a kasuratan a mangipakita iti kasasaad inton masungbatan ti kararag nga insuro ni Jesus kadatayo: “Umay koma ti pagariam. Maaramid koma ti pagayatam, kas sadi langit, kasta met iti daga.” (Mateo 6:10) Nupay kasta, uray daytoy pay laeng maysa ti dakamatentayo: “Nangngegko ti maysa a natbag a timek manipud iti trono a kunana: ‘Adtoy! Ti tolda ti Dios adda iti sangatauan, ket isu makipagnaedto kadakuada, ket isudanto dagiti ilina. Ket ti Dios a mismo addanto kadakuada. Ket punasennanto ti amin a lua kadagiti matada, ket awanton ni patay, awanto metten ti panagleddaang wenno panagsangit wenno ut-ot. Ti immuna a bambanag naglabasdan.’ Ket kinuna Daydiay situtugaw iti trono: ‘Adtoy! Pagbalbalinek a baro ti amin a bambanag.’ Kasta met, kunana: ‘Isuratmo, agsipud ta dagitoy a sasao matalek ken napudnoda.’ ”—Apocalipsis 21:3-5.
[Blurb iti panid 15]
“Napeggad a tiempo a narigat a pakilangenan,”
NGEM “umayton ti panungpalan”
[Ladawan iti panid 18]
Netherlands
[Ladawan iti panid 18]
Nigeria