Naparegta ken Napabileg Dagiti Agdengdengngeg

URAY pay ania dagiti problema a sarsarangtenda, rumbeng a makasarak dagiti adipen ti Dios iti pammaregta iti uneg ti kongregasion Kristiano. Gapuna, masapul a siguraduen nangnangruna dagiti panglakayen a makaparegta dagiti palawag ken balakadda. Agbalin koma dagiti panglakayen a “kas paglemmengan a lugar manipud iti angin ken lugar a pakaitalimengan manipud iti natutudo a bagyo, kas barbaresbes ti danum iti awanan danum a pagilian, kas salinong ti maysa a nadagsen a napasdok a bato iti napaksuyan a daga.”​—Isa. 32:2.

No maysaka a panglakayen, makapabang-ar ken makaliwliwa kadi dagiti palawagmo? Pakirdenda kadi dagidiay mangikagkagumaan nga agserbi a simamatalek ken Jehova? Pabilgenda kadi ida nga agtultuloy a mangaramid iti pagayatan ti Dios nupay iyaleng-aleng wenno busoren ida ti kaaduan a tattao? No ngay masmasnaayan ti dadduma kadagiti agdengdengngeg, madagdagsenanda gapu iti kinarigat ti panagbiag, wenno agsagsagabada iti nakaro a sakit nga awan pay ti natakuatan nga agasna? ‘Mapapigsam ti kakabsatmo iti sasao ti ngiwatmo.’​—Job 16:5.

Usarem ti gundawaymo kas pumapalawag a tumulong kadagiti kakabsatmo a makagun-od iti liwliwa ken kired manipud ken ni Jehova ken kadagiti probision nga impaayna.​—Roma 15:13; Efe. 6:10.

Ipalagipmo Dagiti Nagapuanan ni Jehova. Ti maysa a napateg a wagas a panangpakired ket babaen ti panangipakitam no kasano a tinulongan ni Jehova ti ilina kadagiti pakarigatanda kadagidi naglabas a tiempo.​—Roma 15:4.

Imbaga ni Jehova ken Moises a ‘paregtaen’ ken ‘papigsaenna’ ni Josue sakbay a sumrek ti Israel iti Naikari a Daga, a pagnanaedan idi dagiti nasion a kabusorda. Kasano nga inaramid ni Moises dayta? Iti imatang ni Josue, impalagip ni Moises iti intero a nasion dagiti bambanag nga inaramid ni Jehova maipaay kadakuada idi pimmanawda idiay Egipto. (Deut. 3:28; 7:18) Imbinsabinsa pay ni Moises ti panamagballigi ni Jehova kadakuada maibusor kadagiti Amoreo. Kalpasanna, indagadag ni Moises ken Josue: “Bumilegka ken pumigsaka.” (Deut. 31:1-8) No parparegtaem dagiti kakabsatmo, tultulongam kadi ida a kumired babaen ti pananglagipda kadagiti inaramid ni Jehova maipaay kadakuada?

No dadduma adda dagidiay malapunos kadagiti problemada ket pampanunotenda no masagrapdanto met la ngata dagiti bendision ti Pagarian. Ipalagipmo kadakuada a mapagtalkan dagiti kari ni Jehova.​—Jos. 23:14.

Iti dadduma a pagilian, adda dagiti linteg ti gobierno a mangiparparit kadagiti kakabsat a mangikasaba iti naimbag a damag. Kadagita a kasasaad, dagiti naayat a panglakayen matulonganda dagiti kapammatianda a gumun-od iti kired babaen dagiti kapadasan dagiti apostol ni Jesu-Kristo. (Ara. 4:1–5:42) Ket ti panangitampok iti wagas a panangimaniobra ti Dios kadagiti pasamak a nailanad iti libro nga Ester sigurado a pabilgenna ti nakem dagiti kakabsat.

No dadduma adda dagiti tumabtabuno kadagiti gimong ti kongregasion ngem saanda a rumangrang-ay. Mabalin nga ipapanda a pulos a dinto ida pakawanen ti Dios gapu ta nagdakes ti dati a kabibiagda. Nalabit mabalinmo nga isalaysay no kasano a nakilangen ni Jehova ken Ari Manasses. (2 Cron. 33:1-16) Wenno mabalinmo a saritaen ti maipapan kadagiti tattao iti nagkauna a Corinto a nangbalbaliw iti kabibiagda, nagbalin a Kristiano, ket ti Dios imbilangna ida a nalinteg.​—1 Cor. 6:9-11.

Adda kadi dagidiay mangipagarup a dagiti problema a mapaspasaranda ipasimudaagna nga awanen kadakuada ti parabur ti Dios? Mabalinmo nga ipalagip kadakuada ti napagteng ni Job ken no kasano a sibabaknang a nabendisionan gapu ta nagtalinaed a natarnaw ken Jehova. (Job 1:1-22; 10:1; 42:12, 13; Sal. 34:19) Siuulbod nga imbaga dagiti sinsinan a manangliwliwa ni Job nga isu ket nakabasol. (Job 4:7, 8; 8:5, 6) Iti kasupadina, idi pinapigsada dagiti adalan ken “pinarparegtada ida nga agtalinaed iti pammati,” kinuna da Pablo ken Bernabe: “Masapul a sumrektayo iti pagarian ti Dios babaen iti adu a rigat.” (Ara. 14:21, 22) Kasta met itatta, mapakiredmo dagidiay masusuot babaen ti panangdakamat kadakuada a ti panagibtur iti sidong ti rigat ket makalikaguman kadagiti amin a Kristiano ken nakapatpateg dayta iti imatang ti Dios.​—Prov. 27:11; Mat. 24:13; Roma 5:3, 4; 2 Tim. 3:12.

Paregtaem dagiti agdengdengngeg a mangpanunot no kasano a tinungpal ni Jehova dagiti karina iti mismo a biagda. No palagipam ida, nalabit mabigbigda no kasano a nagtignayen ni Jehova maipuon kadakuada a mismo, kas inkarina. Iti Salmo 32:8, mabasatayo: “Pagbalinenkanto nga addaan iti pannakatarus ket isuroka iti dalan a rebbeng a papanam. Mangipaayakto iti balakad a ti matak situturong kenka.” No tulongam dagiti agdengdengngeg a manglagip no kasano nga inwanwan ken pinapigsa ida ni Jehova, maipabigbigmo kadakuada iti personal unay a pamay-an a maseknan ni Jehova kadakuada, ket pudno a tulonganna ida iti uray ania a suot a mapasaranda iti agdama.​—Isa. 41:10, 13; 1 Ped. 5:7.

Ipakitam a Maragsakanka Kadagiti Ar-aramiden ti Dios Iti Agdama. No parparegtaem dagiti kakabsatmo, dakamatem dagiti ar-aramiden ni Jehova iti agdama. Ti panangisarsarita kadagitoy a banag iti wagas a mangipakita a maragsakanka kadagita parnuayenna ti umasping a rikrikna kadagiti puso dagiti agdengdengngeg.

Usigem no kasano a tultulongannatayo ni Jehova a mangparmek kadagiti pakarigatan iti biag. Ipakitana kadatayo ti kasayaatan a wagas ti panagbiag. (Isa. 30:21) Ilawlawagna no apay nga adda krimen, kinakillo, kinapanglaw, sakit, ken ipapatay ken ibagana kadatayo no kasano a pagpatinggaennanto amin dagita. Pinalikmutannatayo iti naayat a panagkakabsat. Mabalintayo ti agkararag kenkuana, a maysa a napateg a pribilehio nga impaayna kadatayo. Intalekna kadatayo ti pribilehio nga agbalin a Saksina. Impalgakna kadatayo nga agturturayen ni Kristo sadi langit ket asidegen nga agngudo dagiti maudi nga al-aldaw ti daan a sistema.​—Apoc. 12:1-12.

Inayonmo kadagita a bendision dagiti gimong ti kongregasion, asamblea, ken kombension. No dakamatem dagitoy a probision iti wagas a mangipakita iti pudpudno a panangapresiar kadagita, mapabilegmo ti determinasion dagiti dadduma a di mangliway iti pannakitaripnongda kadagiti kakabsatda.​—Heb. 10:23-25.

Makapabileg met dagiti report a mangpaneknek a bembendisionan ni Jehova ti panagbannogtayo iti tay-ak ti ministerio. Idi umuna a siglo, idi nagturong da Pablo ken Bernabe idiay Jerusalem, nangpataudda iti “dakkel a rag-o iti amin a kakabsat” babaen ti detalyado a panangipadamagda iti pannakakomberte dagiti tattao iti nasnasion. (Ara. 15:3) Mapagrag-om met dagiti kakabsat no saritaem kadakuada dagiti makapabileg a kapadasan.

Ad-adda pay a maparegta dagiti indibidual no ipabigbigmo kadakuada ti kinapateg ti ar-aramidenda. Komendaram ti pannakiramanda iti Nakristianuan a ministerio. Komendaram dagidiay limitado unayen ti maaramidanda gapu iti kinalakay ken sakit ngem simamatalek nga agib-ibturda. Ipalagipmo kadakuada a di lipaten ni Jehova ti ayat nga ipakpakitada maipaay iti naganna. (Heb. 6:10) Di magatadan a sanikua ti nasubok a pammati. (1 Ped. 1:6, 7) Masapul a maipalagip daytoy kadagiti kakabsattayo.

Agsaoka nga Addaan Rikna Maipapan iti Namnama iti Masanguanan. Dagiti naipaltiing a kari maipapan kadagiti banag a dumteng iti masanguanan ket dakkel a gubuayan ti pammaregta kadagiti amin nga agayat iti Dios. Mabalin a masansan a mangngeg dagita ti kaaduan kadagiti umim-imdeng kenka. Ngem no napnuan panagyaman ti panangipalawagmo kadagita a kari, mapagbalinmo a nabiag dagitoy, maitukitmo ti panagtalek iti kaitungpalanda, ken malapunos iti panagyaman ti puspuso dagiti agdengdengngeg. Matulongannaka a mangaramid iti dayta ti panangipakatmo kadagiti naadalmo iti Teokratiko nga Eskuelaan ti Panagministro.

Ni Jehova a mismo ti Naindaklan a Manangparegta ken Manangted iti pigsa kadagiti tattaona. Ngem mabalinmo ti makitinnulong kenkuana a mangipaay iti kakasta a parabur. No palawagam ti kongregasion, usarem a naimbag ti gundaway a mangaramid iti kasta.