Surat ti Bagi a Manarawidwid

Kenka a Padami a Mangay-ayat ken Jehova:

“Maammuanyonto ti kinapudno, ket ti kinapudno wayawayaannakayto,” kuna ni Jesus. (Juan 8:32) Anian a makaparegta dagita a sasao! Wen, posible a maammuam ti kinapudno uray no agraraira dagiti palso a sursuro kadagitoy narikut a ‘maudi nga al-aldaw.’ (2 Timoteo 3:1) Malagipmo kadi pay daydi damo a pannakabigbigmo iti kinapudno kas nailawlawag iti Sao ti Dios? Makaparagsak dayta, saan kadi?

Nupay kasta, no kasano a napateg ti pannakagun-od iti umiso a pannakaammo iti kinapudno ken ti regular a panangisarsarita iti dayta kadagiti sabsabali, nasken met nga agbiagtayo a maitunos iti kinapudno. Tapno maaramidtayo dayta, nasken nga agtalinaedtayo iti ayat ti Dios. Ania ti ramanen daytoy? Dagiti sasao ni Jesus iti daydi rabii sakbay ti ipapatayna ti mangsungbat iti daytoy a saludsod. Kinunana kadagiti matalek nga apostolna: “No tungpalenyo dagiti bilinko, agtalinaedkayto iti ayatko, kas iti panangtungpalko kadagiti bilin ti Ama ken panagtalinaedko iti ayatna.”​—Juan 15:10.

Imutektekam ta nagtalinaed ni Jesus iti ayat ti Dios babaen ti panangtungpalna kadagiti bilin ni Amana. Agaplikar met dayta kadatayo ita. Tapno makapagtalinaedtayo iti ayat ti Dios, nasken nga inaldaw nga agbiagtayo a maitunos iti kinapudno. Iti daydi met la a rabii, kinuna ni Jesus: “No ammoyo dagitoy a banag, naragsakkayo no aramidenyo ida.”​—Juan 13:17.

Sipapasnek a namnamaenmi a tulongannaka daytoy a publikasion nga agtultuloy nga agbiag a maitunos iti kinapudno ket iti kasta, makapagtalinaedka iti “ayat ti Dios . . . maipaay iti agnanayon a biag.”​—Judas 21.