Napateg Pay Kadi ti Kinapudno?

Para kenka, narigat kadi nga ilasin ti pudno ken ulbod? Kasla ad-adda a patien dagiti tattao ita ti bambanag a naibatay iti rikrikna ken personal nga opinionda imbes a naibatay iti kinapudno. Kas pagarigan, iti nabiit pay, immadu ti mangus-usar iti termino a “post-truth,” a naimbento a mangdeskribir iti dayta a situasion.a Dayta ti mangdeskribir iti lubong ita, ta adu ti mamati nga awan ti kinapudno.

Saan a baro dayta a kapanunotan. Agarup 2,000 a tawenen ti napalabas, ti Romano a Gobernador a ni Poncio Pilato dinamagna ken Jesus nga addaan panagduadua: “Ania ti kinapudno?” (Juan 18:38) Uray no saanen nga inuray ni Pilato ti sungbat ni Jesus, napateg dayta a saludsodna. Mangipaay ti Biblia iti makakombinsir a sungbat ken tulongannaka a mangammo no ania ti kinapudno iti lubong a matiktikaw no ania ti agpayso ken saan nga agpayso.

Adda kadi kinapudno?

Adda. Us-usaren ti Biblia ti sao a “kinapudno” a tumukoy no ania ti agpayso ken no ania ti umiso wenno nalinteg. Isursurona a ni Jehovab a Dios ti Gubuayan ti kinapudno ken inawaganna iti “Dios ti kinapudno.” (Salmo 31:5) Naglaon ti Biblia iti kinapudno manipud iti Dios, ken inkomparana ti kinapudno iti lawag, a mangiturong kadatayo bayat nga agbibiagtayo iti daytoy nagulo ken nasipnget a lubong.—Salmo 43:3; Juan 17:17.

Kasano a mabirokam ti kinapudno?

Saan a kayat ti Dios a basta awatentayo lattan ti kinapudno a ditay agpanunot. Parparegtaennatayo ketdi nga usarentayo ti abilidadtayo nga agpanunot imbes nga agpannuraytayo lattan iti riknatayo. (Roma 12:1) Kayatna nga am-ammuen ken ayatentayo isuna nga usarentayo ti ‘amin a panunottayo,’ ken parparegtaennatayo a paneknekantayo no umiso met laeng dagiti maad-adaltayo iti Biblia.—Mateo 22:37, 38; Aramid 17:11.

Kasano a nangrugi ti panagulbod?

Ibagbaga ti Biblia a nangrugi ti kinaulbod iti kabusor ti Dios a ni Satanas a Diablo, nga aw-awagan ti Biblia kas “ti ama ti kinaulbod.” (Juan 8:44) Nagulbod maipapan iti Dios kadagiti immuna a tattao. (Genesis 3:1-6, 13, 17-19; 5:5) Sipud idin, nagtultuloy a mangiwarwaras ni Satanas iti kinaulbod ken ilemlemmengna ti kinapudno maipapan iti Dios.—Apocalipsis 12:9.

Apay a gagangayen ita ti panagulbod?

Iti panawentayo nga aw-awagan ti Biblia kas “maudi nga al-aldaw,” nakasaksaknapen iti lubong ti panangallilaw gapu iti impluensia ni Satanas. Gagangay nga agulbod dagiti tattao tapno maallilawda ti dadduma ket magundawayanda ida. (2 Timoteo 3:1, 13) Napno met iti kinaulbod ti kaaduan a relihion ita. Kas impadto ti Biblia iti tiempotayo, “agsapul [dagiti tattao] kadagiti mannursuro a mangibaga iti kayatda a mangngeg” ken “saandanto a dumngeg iti kinapudno.”—2 Timoteo 4:3, 4.

Apay a napateg ti kinapudno?

Ti kinapudno ti nakaibatayan ti panagtalek dagiti tattao iti maysa ken maysa. No awan ti panagtalek, madadael ti panaggagayyem ken ti kagimongan. Ibaga ti Biblia a kayat ti Dios a ti panagdaydayawtayo ket naibatay iti kinapudno. Kunana: “Dagidiay agdaydayaw [iti Dios] masapul nga agdayawda maitunos iti espiritu ken kinapudno.” (Juan 4:24) Tapno maammuam no kasano a makatulong kenka ti kinapudno iti Biblia a mangilasin kadagiti kinaulbod nga isursuro dagiti relihion ken tapno mawayawayaanka kadagita, basaem ti serye dagiti artikulo a napauluan “Apay nga Adu ti Marigatan a Mangayat iti Dios?”

Apay a kayat ti Dios a maammuak ti kinapudno?

Kayat ti Dios a maisalakanka, ket masapul nga ammuem ti kinapudno maipapan kenkuana tapno mapasamak dayta. (1 Timoteo 2:4) No maammuam dagiti pagalagadan ti Dios maipapan iti umiso ken di umiso ken iyaplikarmo dagita, agbalinka a nasinged a gayyemna. (Salmo 15:1, 2) Tapno maammuan dagiti tattao ti kinapudno, imbaon ti Dios ni Jesus ditoy daga. Kayat ti Dios a dumngegtayo kadagiti pannursuro ni Jesus.—Mateo 17:5; Juan 18:37.

Pukawento kadi ti Dios ti kinaulbod?

Wen. Kagurgura ti Dios dagiti tattao a mangallilaw iti dadduma tapno laeng magundawayanda ida. Inkarina a pukawennanto dagidiay agtultuloy nga agulbod. (Salmo 5:6) Inton aramiden ti Dios dayta, tungpalenna met daytoy a karina: “Agtalinaed iti agnanayon ti napudno a bibig.”—Proverbio 12:19.