KAPITULO 38
Kasanok nga Usaren ti Biagko?
“Idi damo, diak madanagan iti masakbayak. Ngem idi umas-asidegen ti panagturposko, naamirisko a mapasarakton dagiti inaldaw a pakaseknan iti biag. Agtrabahoakton tapno maasikasok dagiti kasapulak.”—Alex.
IPAPANTAYON nga agbiaheka iti adayo a lugar. Nalabit kitaem ti mapa tapno mapilim ti kasayaatan a ruta. Umasping dayta iti panangiplanom iti masakbayam. “Nagadu ti pagpiliam,” kinuna ni Michael, maysa nga agtutubo a lalaki nga agserserbi itan iti maysa kadagiti sanga nga opisina dagiti Saksi ni Jehova. Kasanoka a makapili manipud iti adu a pagpilian? “Agdepende dayta kadagiti kalatmo,” kuna ni Michael.
Panunotem a ti kalatmo ket isu ti destinasionmo. Mabalin a saanmo a madanon dayta no agpalpallailangka. Nasaysayaat nga amang no mangalaka iti mapa ket iplanom ti rutam. Iti kasta a pamay-an, matungpalmo ti balakad iti Proverbio 4:26: “Palanasem ti turongen ta sakam.” Kastoy ti panangipatarus ti Contemporary English Version: “Ammuem no sadino ti pagturongam.”
Kadagiti sumaruno a tawtawen, adunto dagiti napapateg nga ikeddengmo maipapan iti panagdayaw, panagtrabaho, panagasawa, pamilia, ken dadduma pay a napateg a banag. Nalaklaka ti agaramid kadagiti nainsiriban a desision no ammuem nga umuna no sadino ti pagturongam. Ket bayat nga ikeddengmo no ania ti kayatmo nga aramiden, adda maysa a banag a nasken a saanmo a liplipatan.
“Laglagipem ti Namarsua Kenka”
No kayatmo ti agbalin a pudpudno a naragsak, nasken nga ipapusom dagiti sasao ni masirib nga Ari Solomon: “Laglagipem ti Namarsua kenka ita ta agtutuboka pay.” (Eclesiastes 12:1, Ti Baro a Naimbag a Damag Biblia) Iti sabali a pannao, ti tarigagaymo a mangay-ayo iti Dios ti mangimpluensia koma iti ikeddengmo a wagas ti panagbiag.
Apay a napateg no daytoy ti ipangpangrunam? Kuna ti Biblia iti Apocalipsis 4:11: “Maikarika, Jehova, a mismo a Diosmi, nga umawat iti dayag ken iti dayaw ken iti pannakabalin, agsipud ta pinarsuam ti amin a bambanag, ket gapu iti pagayatam napaaddada ken naparsuada.” Amin a parsua idiay langit ken ditoy daga rumbeng nga agyamanda iti Namarsua kadakuada. Agyamyamanka met laeng kadi ta inikkannaka ti Dios iti “biag ken anges ken amin a bambanag”? (Aramid 17:25) Saanka kadi a matignay nga agsubad ken Jehova a Dios kas panangipakita iti apresasionmo kadagiti amin nga impaayna kenka?
Gapu ta silalagipda iti Namarsua kadakuada, adu nga agtutubo a Saksi ni Jehova ti simrek iti amin-tiempo a panagserbi. Usigem ti sumagmamano a makaparagsak a pamay-an ti panagserbi a mabalin a silulukat kenka.
Panagpayunir. Mangbusbusbos dagiti regular pioneer iti ad-adu nga oras iti ministerio. Babaen ti panagsanay ken kapadasan, maasa ti abilidadda a mangisuro iti Biblia.
Panagserbi iti lugar nga addaan iti dakdakkel a panagkasapulan. Adda dagiti immakar kadagiti lugar a manmano laeng dagiti agibumbunannag iti Pagarian. Nagsursuro met dagiti dadduma iti sabali a lenguahe ket immakarda iti kabangibangda a kongregasion a ganggannaet ti pagsasaona wenno immakarda pay ketdi iti sabali a pagilian.a
Panagmisionero. Dagiti kualipikado a payunir a nasalun-at ken agkabannuag ket masanay nga agserbi kadagiti ganggannaet a pagilian. Makaparagsak ken makapnek ti biag dagiti misionero.
Panagserbi iti Bethel. Dagiti miembro ti pamilia ti Bethel ket agserserbi kadagiti sanga nga opisina dagiti Saksi ni Jehova. Iti dadduma a pagilian, ramanen daytoy ti panagimprenta ken panagitulod kadagiti literatura a naibatay iti Biblia.
Panagserbi iti sabali a pagilian. Dagiti maaw-awagan iti international servant ket mapan iti nagduduma a pagilian tapno tumulongda a mangibangon kadagiti Kingdom Hall, Assembly Hall, ken pasilidad iti sanga nga opisina.
Ministerial Training School. Dagiti kualipikado ken awanan asawa a panglakayen ken ministerial nga adipen masanayda kadagiti banag a mainaig iti organisasion ken iti panagpalawag iti publiko. Dagiti dadduma a nagturpos ket immannugot nga agserbi kadagiti sabali a pagilian.
Panangiplano Kadagiti Aramidem
Nagsayaat a kalat ti panagserbi iti amin a tiempo ken mangyeg dayta iti di mabilang a bendision. Ngem nasken ti panagpanunot ken panagplano a nasaksakbay. Kas pagarigan, isaludsodmo iti bagim ‘Ania dagiti abilidad ken paglaingak a mabalinko nga usaren tapno masuportarak ti bagik?’
Kayat ni Kelly ti agpayunir isu nga implanona dagiti aramidenna no maipapan iti panggedanna. “Masapul nga agpiliak idi iti panggedan a makatulong kaniak iti ministeriok,” kinunana.
Nangala ni Kelly iti bokasional a kurso idi adda iti haiskul. Nakatulong daytoy kenkuana a mangragpat iti kangrunaan a kalatna. “Kayatko ti sumrek iti amin-tiempo a ministerio,” kuna ni Kelly. “Maikadua laeng iti biagko dagiti dadduma pay a banag.” Naragsak ni Kelly iti desisionna. “Patiek a ti desisionko ti kasayaatan pay laeng a naaramidak,” kinunana.
Agpaiwanwanka
No agbibiaheka iti lugar a dimo kabesado, mabalin nga adda kanito a masapul nga agdamagka. Mabalinmo met nga aramiden ti kasta no ipalplanom ti masakbayam. Agpabalakadka kadagiti sabsabali. Kuna ti Proverbio 20:18: “Babaen iti pammatigmaan maipasdek a sititibker dagiti mismo a gakat.”
Dagiti dadakkelmo ti maysa kadagiti napateg unay a pagpabalakadam. Ngem mabalinmo met ti agpabalakad kadagiti dadduma pay a nataengan ti panagpampanunotna a Kristiano a mangiparparangarang iti nadiosan a sirib. “Tuladem dagidiay mapagwadan a nataengan iti kongregasionyo wenno dagiti adda iti kabangibang a lugar,” insingasing ni Roberto, a nagbalin a miembro ti pamilia ti Bethel idi agtawen iti 27.
Kangrunaan iti amin, kayatnaka a tulongan ni Jehova a Dios a mangaramid kadagiti desision iti biag a mangyeg kenka iti kasta unay a ragsak. Gapuna, kiddawem a tulongannaka tapno ‘maitultuloymo a lasinen no ania ti pagayatanna’ maipanggep iti masanguanam. (Efeso 5:17) Iti tunggal aspeto ti biagmo, surotem ti balakad ti Proverbio 3:5, 6: “Agtalekka ken Jehova buyogen ti isuamin a pusom ket dika agkammatalek iti bukodmo a pannakaawat. Isu imutektekam iti amin a daldalanmo, ket isu palintegennanto dagiti danam.”
Para iti kanayonan nga impormasion, buyaem ti DVD a “Young People Ask—What Will I Do With My Life?” Magun-odan daytoy iti nasurok a 30 a lenguahe
[Footnote]
a Kitaem ti kahon iti panid 164.
KANGRUNAAN A TEKSTO
“‘Subokendak . . . ,’ kinuna ni Jehova ti buybuyot, ‘no saankonto a luktan kadakayo dagiti aribengbeng ti langlangit ket pudno a mangibukbokakto kadakayo iti bendision agingga nga awanen panagkasapulan.’”—Malakias 3:10.
BALAKAD
Makisaritaka kadagiti nabayagen nga agserserbi iti amin a tiempo. Ammuem no apay a pinilida ti kasta a karera ken kasano a nariknada a mabembendisionanda.
AMMOM KADI . . . ?
Ti koriente paandarenna ti maysa nga alikamen. Umasping iti dayta, ti nasantuan nga espiritu tignayennaka tapno adu ti maaramidam iti panagserbim iti Dios.—Aramid 1:8.
DAGITI ARAMIDEK!
Tapno ad-adda a matagiragsakko ti ministeriok, makisaritaak kadagiti ․․․․․
Ti kayatko a saludsoden kadagiti dadakkelko maipapan iti daytoy a banag ket ․․․․․
ANIA TI MAKUNAM?
● Ania dagiti abilidad ken paglaingam?
● Kasanom a mausar dagiti abilidadmo a mangidaydayaw ken Jehova?
● Ania ti magustuam unay a partikular a kita ti amin-tiempo a panagserbi a nadakamat iti daytoy a kapitulo?
[Blurb iti panid 313]
“Ap-apresiarek unay dagiti dadakkelko. Nagsayaat ti epekto kaniak ti kinaregtada iti ministerio, ti wagas a panangtamingda iti kinarigat ti biag, ken ti panangparegtada kaniak a sumrek iti amin-tiempo a ministerio.”—Jarrod
[Kahon iti panid 314]
Worksheet
Dagiti Kalatko
Kur-itam dagiti kalat a kayatmo nga ipasdek. Usarem dagiti espasio a pangisuratam kadagiti kalatmo wenno no mangisuratka iti sabali a kalat.
Kalat Mainaig iti Ministerio
□ Nayonak iti ․․․․․ nga oras ti tiempo a busbosek iti ministerio iti tunggal bulan
□ Mangipaimaak iti ․․․․․ a literatura iti tunggal bulan
□ Usarek ti Biblia no isarsaritak ti maipapan iti pammatik
□ Mangaramidak iti ․․․․․ a panagsarungkar iti tunggal bulan
□ Mangirugiak iti panangyadal iti Biblia
Dadduma pay a kalat: ․․․․․
Kalat Mainaig iti Panagadal
□ Mangbasaak iti ․․․․․ a panid ti Biblia iti tunggal aldaw
□ Agsaganaak para kadagiti linawas a gimong
□ Sukimatek dagiti sumaganad a topiko iti Biblia: ․․․․․
Kalat Mainaig iti Kongregasion
□ Agkomentoak uray maminsan laeng wenno nasursurok pay iti tunggal gimong
□ Siak ti umasideg a makisarita iti maysa a nataengan a kayatko a maam-ammo pay a naimbag
□ Sarungkarak ti maysa a nataengan wenno nakapuy ti salun-atna a kakongregasionko
Dadduma pay a kalat: ․․․․․
Ti Petsa ita nga Aldaw ․․․․․
Repasuem daytoy a listaan kalpasan ti innem a bulan ket kitaem no ania ti naaramidam iti panangragpatmo kadagitoy a kalat. Baliwam wenno nayonam dagita a kalat no kasapulan.
[Ladawan iti panid 312]
No addaanka kadagiti kalat, saan a masayang ti pigsam kadagiti awan kaes-eskanna a banag