Masapul a Mangpakawan

Nangngeg ni Pedro ti balakad ni Jesus no kasano a tamingen ti di pagkikinnaawatan dagiti kakabsat babaen ti panangikagumaanda a mangrisut nga is-isuda. Nupay kasta, kayat a maammuan ni Pedro no mamin-ano a masapul nga aramiden ti maysa dayta.

Insaludsod ni Pedro: “Apo, mamin-ano a pakawanek ti kabsatko nga agbasol kaniak? Mamimpito?” Isursuro ti dadduma a lider ti relihion a masapul a mangpakawan ti maysa agingga iti mamitlo. Isu a mabalin a narikna ni Pedro nga isu ket naasi unay no “mamimpito” a pakawanenna ti maysa a kabsat.​—Mateo 18:21.

Nupay kasta, ti panagilista wenno panangbilang kadagiti basol ket saan a maitunos iti pannursuro ni Jesus. Gapuna, tinubngarna ni Pedro: “Ibagak kenka, saan laeng a mamimpito, no di ket mamim-77.” (Mateo 18:22) Kayatna a sawen, saan koma nga agpatingga ti panangpakawan ni Pedro iti kabsatna.

Kalpasanna, imbaga ni Jesus ken Pedro ken iti dadduma ti maysa nga ilustrasion tapno ipaganetgetna kadakuada ti obligasionda a mangpakawan. Maipapan dayta iti adipen a saan a nangtulad iti naasi nga apona. Kayat ti ari a singiren ti utang dagiti adipenna. Naiyeg kenkuana ti maysa nga adipen nga adda nagdakkel nga utangna nga aggatad iti 10,000 a talento [60,000,000 a denario]. Awan ti maibayadna iti utangna, isu nga imbilin ti ari a mailako dayta nga adipen, ti asawana, ken dagiti annakna tapno makabayad. Gapuna, nagparintumeng ti adipen ket impakpakaasina iti apona: “An-anusannak koma, apo, ta bayadakto amin nga utangko.”​—Mateo 18:26.

Naasian ti ari ket saannan a pinabayadan ti dakkel nga utang ti adipen. Kalpasan a saan a pinabayadan ti ari ti utangna, binirok daytoy nga adipen ti padana nga adipen a nakautang kenkuana iti 100 a denario. Ginammatanna sana binekkel, ket kinunana, “Bayadam ti utangmo.” Ngem nagparintumeng ti padana nga adipen ket impakpakaasina: “An-anusannak koma ta agbayadakto.” (Mateo 18:​28, 29) Ngem ti adipen a pinakawan ti ari ti utangna saanna a tinulad ti apona. Impaibaludna ti padana nga adipen, a basbassit nga amang ti utangna, agingga a mabayadanna ti utangna.

Kalpasanna, insalaysay ni Jesus a nagipulong ti dadduma nga adipen a nakakita iti daytoy a saan a naasi a panangtrato. Nakapungtot ti ari ket pinaayabanna ti adipen. Kinunana: “Dakes nga adipen, idi nagpakaasika kaniak, saankon a pinabayadan ti utangmo. Saan kadi a naasianka met koma iti padam nga adipen, kas iti panangngaasik kenka?” Impaibalud ti nakapungtot nga ari ti adipen agingga a mabayadanna ti amin nga utangna. Inngudo ni Jesus: “Kastanto met ti aramiden kadakayo ni Amak nga adda idiay langit no saanyo a pakawanen a naimpusuan ti kabsatyo.”​—Mateo 18:​32-35.

Nagsayaat ti masursurotayo iti dayta maipapan iti panangpakawan! Pinakawan ti Dios ti nagdakkel a basoltayo. Aniaman a basol a maaramid ti kabsattayo kadatayo ket nagbassit no idilig iti basoltayo iti Dios. Ket saan la a maminsan a pakawanennatayo ni Jehova, no di ket maminribu. Saantayo kadi a mapakawan ti kabsattayo iti mamin-adu a daras, uray no adda met reklamotayo? Kas insuro ni Jesus iti Sermonna iti Bantay, ti Dios ‘pakawanenna dagiti basoltayo, a kas met iti panangpakawantayo kadagiti nakabasol kadatayo.’​—Mateo 6:12.