Organisado a Mangaramid iti Pagayatan ni Jehova

NAGADU ti organisasion iti intero a lubong. Adda organisasion ti kagimongan, relihion, politika, ken komersio. Nagduduma ti ar-aramid, panggep, panangmatmat, ken pilosopiada. Ngem adda organisasion a naidumduma kadakuada amin. Nalawag nga ipakita ti Sao ti Dios a dayta nga organisasion ket dagiti Saksi ni Jehova.

² Makaparagsak ta naitimpuyogkan iti organisasion ni Jehova. Gapu ta naammuamon ti pagayatan ti Dios, ar-aramidemon dayta. (Sal. 143:10; Roma 12:2) Aktiboka a ministro nga agserserbi a kadua dagiti naayat a kakabsatmo iti intero a lubong. (2 Cor. 6:4; 1 Ped. 2:17; 5:9) Kas inkari ti Sao ti Dios, mangyeg daytoy kenka iti adu a bendision ken kinaragsak. (Prov. 10:22; Mar. 10:30) No simamatalek nga aramidem itan ti pagayatan ni Jehova, maisagsaganaka maipaay iti naragsak ken agnanayon a masanguanan.​—1 Tim. 6:18, 19; 1 Juan 2:17.

³ Ti Naindaklan a Namarsua kadatayo ket addaan iti naisangsangayan nga organisasion iti intero a lubong a maiturturayan iti teokratiko a pamay-an. Kaipapananna nga iturturayan dayta ni Jehova, kas Ulo ti isuamin. Naan-anay nga agtalektayo kenkuana. Isu ti Ukom, Manangted-linteg, ken Aritayo. (Isa. 33:22) Gapu ta organisado a Dios, addaan kadagiti nagsayaat nga urnos a tumulong kadatayo tapno sangsangkamaysatayo a ‘makipagtrabaho’ kenkuana a mangitungpal iti panggepna.​—2 Cor. 6:1, 2.

⁴ Bayat nga umas-asideg ti panungpalan ti agdama a sistema ti bambanag, umabantetayo babaen ti panangidaulo ti nadutokan nga Ari a ni Kristo Jesus. (Isa. 55:4; Apoc. 6:2; 11:15) Impakpakauna ni Jesus nga ad-adu ti aramiden dagiti pasurotna ngem ti inaramidna bayat ti ministeriona ditoy daga. (Juan 14:12) Mapasamak dayta gapu ta iti napapaut a tiempo ken umad-adu a bilangda, nalawlawa a teritoria ti makasabaan dagiti pasurot ni Jesus. Ipakaammoda ti naimbag a damag ti Pagarian iti intero a daga.​—Mat. 24:14; 28:19, 20; Ara. 1:8.

⁵ Mapaspasamaken daytoy. Ngem nalawag nga imbaga ni Jesus nga iti tiempo nga inkeddeng ni Jehova, agpatingga ti trabaho a panangipakaammo iti naimbag a damag. Ipakita ti amin a pagilasinan a nadakamat iti naipadto a Sao ti Dios nga asidegen ti dakkel ken nakaam-amak nga aldaw ni Jehova.​—Joel 2:31; Sof. 1:14-18; 2:2, 3; 1 Ped. 4:7.

⁶ Gapu ta ammotayo ti pagayatan ni Jehova iti maudi nga al-aldaw, ad-adda nga ikagumaantayo nga aramiden ti kalikagumanna. Ammuentayo ngarud a naimbag no kasano ti panagandar ti organisasion ti Dios ken naan-anay a makitinnulongtayo iti dayta. Ti panagandar ti organisasion ket naibatay kadagiti prinsipio ti Biblia, agraman dagiti bilin, linteg, pagalagadan, ken pannursuro a nailawlawag iti naipaltiing a Sao ti Dios.​—Sal. 19:7-9.

⁷ No ipangag ti ili ni Jehova ti panangiwanwan a naibasar iti Biblia, makapagnaed ken makapagtrabahoda nga addaan iti talna ken panagkaykaysa. (Sal. 133:1; Isa. 60:17; Roma 14:19) Ania ti mangpabileg iti relasiontayo nga agkakabsat sadinoman ti pagnanaedantayo? Awan sabali no di ti ayat. Ipakitatayo ti ayat ken aramidentayo ti amin a bambanag gapu iti ayat. (Juan 13:34, 35; Col. 3:14) No aramidentayo daytoy, anamongannatayo ti Dios ken makidangdanggaytayo iti nailangitan a paset ti organisasion ni Jehova.

TI NAILANGITAN A PASET TI ORGANISASION NI JEHOVA

⁸ Da propeta Isaias, Ezekiel, ken Daniel, nakitada dagiti sirmata maipapan iti nailangitan a paset ti organisasion ni Jehova. (Isa., kap. 6; Ezek., kap. 1; Dan. 7:9, 10) Nakita met ni apostol Juan ti sirmata maipapan iti daytoy nailangitan nga urnos ken impakitana dayta kadatayo iti libro nga Apocalipsis. Nakitana ni Jehova a nakatugaw iti nadayag a trono a kadua dagiti anghel nga agkunkuna: “Nasantuan, nasantuan, nasantuan ni Jehova a Dios, ti Mannakabalin-amin, nga adda idi ken adda ita ken um-umay.” (Apoc. 4:8) Nakita met ni Juan nga “iti tengnga ti trono . . . agtaktakder ti maysa a kordero,” ti Kordero ti Dios, ni Jesu-Kristo.​—Apoc. 5:6, 13, 14; Juan 1:29.

⁹ Ti sirmata a nakatugaw ni Jehova iti trono ipakitana nga isu ti Ulo daytoy nga organisasion. Kastoy ti kuna ti 1 Cronicas 29:11, 12 maipapan kenkuana ken ti natan-ok a saadna: “Kukuam, O Jehova, ti kinanaindaklan, pannakabalin, kinangayed, ken kinadayag, ta kukuam ti amin nga adda iti langit ken daga. Kukuam ti pagarian, O Jehova. Sika ti nangitan-ok iti bagim kas panguluen ti amin. Naggapu kenka ti kinabaknang ken dayag, ken iturturayam ti amin. Adda iti imam ti pannakabalin ken bileg, ken makaaramidka iti nakaskasdaaw a bambanag, ken kabaelam nga ikkan iti bileg ti asinoman.”

¹⁰ Kas katrabahuan ni Jehova, nangato ti saad ni Jesu-Kristo idiay langit ken naited kenkuana ti dakkel nga autoridad. Kinapudnona, ti Dios ‘impasakupna ti amin a banag iti baba dagiti saka ni Kristo, ket pinagbalinna nga ulo ti amin a banag iti kongregasion.’ (Efe. 1:22) Kinuna ni apostol Pablo maipapan ken Jesus: “Intan-ok ti Dios iti nangatngato a posision ken sipaparabur nga inikkanna iti nagan a nangatngato ngem iti aniaman a sabali a nagan, tapno iti nagan ni Jesus, agparintumeng koma ti tunggal tumeng​—dagiti adda idiay langit ken dagiti adda ditoy daga ken dagiti adda iti uneg ti daga​—ken iyebkas koma ti amin a bigbigenda a ni Jesu-Kristo ket Apo a pakaitan-okan ti Dios nga Ama.” (Fil. 2:9-11) Makapagtalektayo ngarud a naan-anay iti nalinteg a panangidaulo ni Jesu-Kristo.

¹¹ Nasirmata ni propeta Daniel ti Kadaanan iti Al-aldaw a nakatugaw iti tronona idiay langit ken dagiti anghel a ti bilangda ket “sangaribu a rinibu a nagtultuloy a nagserbi kenkuana, ken sangapulo a ribu a maminsangapulo a ribu ti nakatakder iti sanguananna.” (Dan. 7:10) Ti Biblia tukoyenna daytoy a buyot dagiti anghel kas ‘espiritu para iti nasantuan a panagserbi, a naibaon tapno agserbi kadagidiay agtawid iti pannakaisalakan.’ (Heb. 1:14) Amin dagitoy nga espiritu a parsua ket naorganisar iti ‘trono, turay, gobierno, ken autoridad.’​—Col. 1:16.

¹² No iwayaantayo nga utoben dagitoy nga aspeto ti nailangitan a paset ti organisasion ni Jehova, matarusantayo ti reaksion ni Isaias iti maysa a sirmata idi ‘nakitana ni Jehova a situtugaw iti nadayag ken nangato a tronona,’ ket “nakatakder dagiti serafin iti ngatuenna.” Kinuna ni Isaias: “Kaasiak pay! Arigko ti natay, ta maysaak a lalaki a narugit ti bibigna, ken agnanaedak iti tengnga ti ili a narugit ti bibigna; ta nakitak ti Ari, ni Jehova a panguluen dagiti armada!” Talaga a nasdaaw ni Isaias ta imbilangna ti bagina a nanumo unay idi naawatanna ti saklawen ti organisasion ni Jehova. Natignay iti nakitana a sirmata ta idi adda awis manipud langit para iti naisangsangayan a trabaho a panangipakaammo iti panangukom ni Jehova, kinuna ni Isaias: “Adtoyak! Ibaonnak.”​—Isa. 6:1-5, 8.

¹³ Kas ken Isaias, matignay met ti ilina no maawatan ken apresiarenda ti organisasion ni Jehova. Ikagumaantayo koma ti makidanggay iti umab-abante nga organisasion. Agtalektayo koma iti organisasion ni Jehova ita.

RUMANGRANG-AY TI ORGANISASION NI JEHOVA

¹⁴ Iti kapitulo 1 ti padto ni Ezekiel, nailadawan ni Jehova a nakasakay iti nagdakkel a nailangitan a karuahe. Daytoy nadayag a lugan irepresentarna ti di makita a paset ti organisasion ni Jehova. Ti panaglugan ni Jehova iti karuahe ket kaipapananna a siaayat nga iturturong ken us-usarenna ti organisasionna maitunos iti panggepna.​—Sal. 103:20.

¹⁵ Iti tunggal pilid daytoy a karuahe, adda pilid iti unegna a kapadana ti diametro ken nakapuesto a pabaribar. Gapuna, “makapanda iti aniaman kadagiti uppat a direksion.” (Ezek. 1:17) Makapagbaliw a dagus dagiti pilid iti pagturonganda. Ngem dina kayat a sawen nga awan ti mangkonkontrol wenno mangiturturong iti daytoy a karuahe. Saan nga ipalubos ni Jehova nga uray sadino lattan ti pagturongan ti organisasionna. Kuna ti Ezekiel 1:20: “Mapanda iti pangiturongan kadakuada ti espiritu.” Gapuna, ni Jehova ti mangiturturong iti organisasionna iti sadinoman a pangiturongan ti espirituna. Nasayaat nga isaludsodtayo iti bagitayo, ‘Makidangdanggayak kadi iti dayta?’

¹⁶ Ti pannakidanggay iti organisasion ni Jehova ket saan laeng a pannakigimong ken panangasaba. Kangrunaanna, ti pannakidanggaytayo ket nainaig iti panagrang-aytayo iti naespirituan. Masapul a ‘siguraduentayo ti napatpateg a bambanag’ ken ammuentayo dagiti kabaruan a naespirituan a taraon. (Fil. 1:10; 4:8, 9; Juan 17:3) Laglagipentayo met a tapno agbalintayo nga organisado, masapul nga agtutunos ken agtitinnulongtayo. Masapul ngarud nga ammotayo nga usaren iti kasayaatan a pamay-an dagiti naespirituan ken material a sanikua nga intalek kadatayo ni Jehova tapno maitungpaltayo ti trabahona. Agbibiagtayo a maitunos iti mensahe nga ipakpakaammotayo no makidangdanggaytayo iti nailangitan a karuahe ni Jehova.

¹⁷ Babaen ti tulong ti organisasion ni Jehova, rumangrang-aytayo a mangaramid iti pagayatan ti Dios. Laglagipentayo a ni Jehova ti nakasakay iti nailangitan a karuahe. Gapuna, ipakpakitatayo a raraemen ken agtalektayo ken Jehova, ti Dakkel a Bato, no makidanggaytayo iti nailangitan a karuahena. (Sal. 18:31) Inkari ti Biblia: “Papigsaen ni Jehova dagiti tattaona. Iyeg ni Jehova ti talna kadakuada kas bendisionna.” (Sal. 29:11) Kas paset ti organisasion ni Jehova ita, pabpabilgennatayo ken tagtagiragsakentayo ti talna nga ipapaayna iti organisado nga ilina. Wen, sigurado a sagrapentayo ti adu a bendision bayat nga ar-aramidentayo ti pagayatan ni Jehova ita ken iti agnanayon.