Nagrebeldeda ken Jehova

Idi adda dagiti Israelita iti let-ang, nagrebelde ken Moises da Kore, Datan, Abiram, ken ti 250 a dadduma pay nga Israelita. Imbagada kenkuana: ‘Naumakamin kadakayo! Apay koma a sika ti agbalin a lidermi ken ni Aaron ti nangato a padi? Adda ni Jehova kadatayo amin, saan laeng a kadakayo ken Aaron.’ Saan a naragsakan ni Jehova. Imbilangna dayta kas panagrebelde kenkuana!

Imbaga ni Moises ken Kore ken kadagiti kakaduana: ‘Mapankayo iti tabernakulo inton bigat, ken itugotyo dagiti pagikkanyo iti insienso ket kargaanyo iti insienso. Ipakitanto ni Jehova no asino ti pinilina.’

Kabigatanna, ni Kore ken ti 250 a lallaki ket napan ken ni Moises iti tabernakulo. Nagpuorda iti insienso a kaslada la papadi. Imbaga ni Jehova kada Moises ken Aaron: ‘Umadayokayo ken Kore ken kadagiti kakaduana.’

Napan ni Kore iti tabernakulo ngem saan a napan da Datan, Abiram, ken dagiti pamiliada. Imbaga ni Jehova kadagiti Israelita nga umadayoda iti tolda da Kore, Datan, ken Abiram. Dagus nga immadayo dagiti Israelita. Nagtalinaed da Datan, Abiram, ken dagiti pamiliada iti ruar dagiti toldada. Bigla a nagnganga ti daga ket inalun-onna ida! Iti tabernakulo, adda nagtinnag nga apuy ket napuoran ni Kore ken ti 250 a kakaduana.

Kalpasanna, imbaga ni Jehova ken Moises: ‘Mangalaka iti maysa a baston iti lider ti kada tribu, sa isuratmo ti naganna iti dayta. Ngem iti baston ti tribu ni Levi, isuratmo ti nagan ni Aaron. Ikabilmo dagita iti uneg ti tabernakulo, ket agsabongto ti baston ti lalaki a piliek.’

Iti simmaruno nga aldaw, inruar ni Moises dagiti baston ket impakitana kadagiti lider. Nagsabong ti baston ni Aaron ken nagbunga iti naluom nga almendro (almond). Babaen iti dayta, impakita ni Jehova a ni Aaron ti pinilina nga agbalin a nangato a padi.