BESTIALIDAD

Di nakaisigudan a seksual a pannakidenna ti lalaki wenno babai iti maysa nga animal. Ti Mosaiko a Linteg siiinget a kinondenarna daytoy a ballikug nga aramid, a sentensiaanna a matay ti nakabasol a tao ken ti animal. “No ti maysa a lalaki itedna ti agruar a semiliana iti animal, rebbeng nga isu mapapatay a di bumurong, ket rebbeng a papatayenyo ti animal. Ket no ti maysa a babai umasideg iti aniaman nga animal tapno makinaig iti dayta, masapul a papatayem ti babai ken ti animal.”​—Le 20:15, 16; 18:23; Ex 22:19; De 27:21.

Daytoy a panangiparit, agraman ti dadduma pay a linteg ti Dios maipapan iti seksual a panagdenna, insaadna dagiti Israelita iti adayo a nangatngato a tukad iti moral no idilig kadagiti kaarrubada. Idiay Egipto, naibilang ti bestialidad kas paset ti idolatroso a panagdaydayaw iti animal; patalgedan dagiti historiador ti pannakidenna ti babbai kadagiti kalding, bilang pagarigan. Nagraira met kadagiti Canaanita ti umasping nga ar-aramid (Le 18:23-30), ket naipadamag a kasta met laeng idiay Roma.

Ti nagdakes nga aramid a bestialidad nairaman iti Griego a sao a por·neiʹa a naipatarus a “pannakiabig.” (Kitaenyo ti PANNAKIABIG.) Ti asinoman a maigamer iti kasta a naalas nga aramid ket narugit iti moral, ket no ti maysa a kameng ti kongregasion Kristiano maigamer idi iti kasta nga aramid, mailaksid dayta a tao.​—Efe 5:3; Col 3:5, 6.