TANDA A MARKA

Iti sumagmamano a pagano, dagiti tanda a marka a nadumaduma ti disenioda ket naisinit wenno nayukrit iti lasag dagiti adipen kas pagilasinan nga adda makinkukua kadakuada. Impadto ni Jehova a maaddaan dagiti natangsit a babbai ti Juda iti “tanda a marka [Heb., ki] imbes a kinalibnos” kas ad-adipen dagiti ganggannaet a manangparmek.​—Isa 3:24.

No dadduma, dagiti agdaydayaw iti idolo inmarkada iti bagbagida ti nagan, emblema, wenno ladawan ti idolo a diosda tapno iparangarangda ti debosionda iti dayta a dios. Ti inggagara a panangsugat iti lasag ket naiparit iti sidong ti Mosaiko a Linteg. (Le 19:28) Sigun iti Linteg, ti kakaisuna a marka a maikabil iti adipen isu ti tebbeng ti lapayag daydiay boluntario a mangkiddaw nga agpaadipen iti apona “agingga iti tiempo a di nakedngan.”​—De 15:16, 17.

Insurat ni Pablo kadagiti taga Galacia: “Aw-awitek iti bagik dagiti tanda a marka [Gr., stigʹma·ta] ti maysa nga adipen ni Jesus.” (Ga 6:17) Naglak-am iti adu a pisikal a pannakaabuso ti nainlasagan a bagi ni Pablo gapu iti panagserbina kas Kristiano, ket sigurado a nagpiglat ti bagina iti dadduma a sinagabana, a dayta ti mangpaneknek a pudno ti kinunana nga isu ket matalek nga adipen a kukua ni Jesu-Kristo. (2Co 11:23-27) Mabalin a dagitoy ti tuktukoyenna a marka. Wenno mabalin a tuktukoyenna ti panagbiagna kas maysa a Kristiano, nga imparparangarangna ti bunga ti espiritu iti panangitungpalna iti Nakristianuan a ministeriona.​—Kitaenyo ti MARKA.