KOSTABLE
Opisial a katulongan a naituding a mangbayabay iti Romano a mahistrado no adda iti publiko ken mangipakat kadagiti pammilinna. Ti Griego a termino a rha·bdouʹkhos literal a kaipapananna ti “agaw-awit iti pang-or.” (Ara 16:35, 38; idiligyo ti Int.) Lictor ti Romano a termino maipaay iti dayta, ket ti lictor iti maysa a kolonia ti Roma nagawit iti fasces kas pagilasinan ti akem ken simbolo ti autoridad ti mahistrado. Ti fasces ket sangareppet nga elm wenno ung-ungkay ti birch nga adda putan ti maysa a wasay iti tengngana, a ti tadem ti wasay agdawadaw iti sidiran dayta.
Ti sumagmamano kadagiti annongen dagiti Romano a kostable ket kasla pumada kadagiti annongen ti polis, ngem naidumada kadagiti agdama-aldaw a polis ta dagiti kostable agserserbida laeng iti mahistrado, a pagrebbenganda ti kanayon nga adda iti sibayna. Saanda a direkta nga agtignay maipaay kadagiti umili no di ket kadagiti laeng bilin ti mahistradoda.
No ti mahistrado agparang iti publiko, ipakaammo dagiti kostablena ti isusungadna, wayaanda ti pagnaanna a lumasat iti bunggoy, ket siguraduenda a maipaayan iti panagraem a maikari iti ranggona. Nangisaadda kadagiti guardia iti balayna. Indanonda dagiti mensahe ti mahistrado, inyegda dagiti managlabsing iti saklang ti mahistrado, ken tiniliwda dagiti managsalungasing iti linteg, a no dadduma saplitenda ida.
Sigun iti linteg, nadutokan dagiti kostable nga agserbi iti makatawen, ngem iti aktual masansan a nagserbida iti nabaybayag. Ti kaaduan kadakuada ket nawayawayaan a tao. Saan a nairaman dagiti Romano a kostable manipud panagserbi iti militar ket natangdananda gapu iti serbisioda.
Yantangay ti Filipos ket kolonia idi ti Roma, tinarawidwidan dayta dagiti mahistrado sibil ti imperio, ket dagitoy idi ti nangted iti bilin a mapangpang-or da Pablo ken Silas. Iti simmaganad nga aldaw, dagiti mahistrado sibil imbaonda dagiti kostable ket imbilinda a maluk-atan da Pablo ken Silas. Nupay kasta, saan nga inawat ni Pablo ti tulong dagiti kostable no di ket kinalikagumanna a dagiti opisial nga adda iti ngatuenda, dagiti mahistrado sibil, bigbigenda ti biddutda.—Ara 16:19-40; kitaenyo ti MAHISTRADO.