KOMBENSION
Panaguummong wenno panagtataripnong dagiti tattao maipaay iti espesipiko a panggep; maysa nga asamblea. Iti Kasuratan, ti termino a “kombension” ket pakaipatarusan ti Hebreo a sao a miq·raʼʹ, kaipapananna ti “panangayab nga aguummong,” wenno “panamagtaripnong; panangummong.” Ti maysa a maisukat a patarus daytoy a Hebreo a sao ket “panaguummong.” Ti mangpasingked iti kangrunaan a kaipapananna ket ti pannakausar dayta iti Numeros 10:2 a mangipasimudaag iti kapanunotan a panamagtaripnong iti gimong ti Israel.—Idiligyo ti Isa 1:13, Rbi8 ftn.
Nayeskediul dagiti “nasantuan a kombension” kas iti sumaganad: (1) Tunggal Sabbath (Le 23:3); (2) ti umuna ken maikapito nga al-aldaw ti Piesta dagiti Di Pinaalsa a Tinapay bayat ti Nisan, ti umuna a bulan (Marso-Abril) (Nu 28:18, 25; Le 23:6-8); (3) ti Piesta dagiti Lawas wenno Piesta ti Panagani, nga idi agangay pagaammo kas Pentecostes, a naangay iti maikatlo a bulan, Sivan (Mayo-Hunio) (Le 23:15-21); (4) ti umuna ken maikasangapulo nga al-aldaw ti maikapito a bulan, Etanim wenno Tisri (Setiembre-Oktubre), a ti naud-udi a nadakamat nga aldaw ket Aldaw ti Panangabbong (Le 23:23-27; Nu 29:1, 7); (5) ti umuna nga aldaw ti Piesta dagiti Abong-abong, a nangrugi iti maika-15 nga aldaw ti maikapito a bulan, Etanim wenno Tisri, kasta met ti aldaw kalpasan dayta a pito-aldaw a piesta.—Le 23:33-36.
Ti naidumduma nga aspeto amin dagitoy a “nasantuan a kombension” ket ti saan a panagaramid dagiti umili iti napagel a trabaho bayat dagita. Kas pagarigan, ti umuna ken maikapito nga al-aldaw ti Piesta dagiti Di Pinaalsa a Tinapay ket “nasantuan a kombension,” a kinuna ni Jehova maipapan kadagita: “Awan ti trabaho a maaramid kadagita. Ti laeng kasapulan a kanen ti tunggal kararua, dayta laeng ti mabalin nga aramiden maipaay kadakayo.” (Ex 12:15, 16) Nupay kasta, bayat dagiti “nasantuan a kombension,” ti papadi ket makumikom nga agidatdaton kadagiti sakripisio ken Jehova (Le 23:37, 38), a pudno unay a saan a panangsalungasing iti aniaman a bilin maibusor iti panangaramid iti kadawyan nga inaldaw a trabaho. Dagitoy nga okasion ket saan met a panawen ti kinaawan ar-aramiden maipaay kadagiti umili iti pangkaaduan no di ket tiempo ti dakkel a naespirituan a gunggona. Iti linawas nga aldaw ti Sabbath, aguummong dagiti umili maipaay iti publiko a panagdaydayaw ken pannakaisuro. Kalpasanna napatibkerda iti publiko a pannakaibasa ken pannakailawlawag ti naisurat a Sao ti Dios, kas kadagiti sinagoga idi agangay. (Ara 15:21) Gapuna, yantangay saan nga agaramid idi dagiti umili iti napagel a trabaho bayat ti aldaw ti Sabbath wenno iti dadduma pay a “nasantuan a kombension,” ipamaysada ngarud ti bagbagida iti panagkararag ken panangmennamenna iti Namarsua ken iti pangpanggepna.—Kitaenyo ti GIMONG, ASAMBLEA.