KOMANDANTE TI MILITAR

Ti Griego a sao a khi·liʹar·khos (chiliarch) kaipapananna ti “komandante ti 1,000 a soldado.” Malaksid iti pannakaaramatna iti Apocalipsis, tumukoy dayta iti maysa a tribuno militar ti Roma. Adda innem a tribuno iti tunggal lehion ti Roma. Nupay kasta, ti lehion ket saan a nabingbingay iti innem a buyot a tunggal maysa adda iti sidong ti maysa a komandante. Dagiti tribuno ket napagpaparis. Tunggal paris imatonanna ti intero a lehion iti dua-bulan kada tawen.​—Kitaenyo ti BUYOT (Romano).

Naipaayan iti dakkel nga autoridad ti kasta a komandante ti militar. Nangdutok ken nangituding kadagiti senturion. Nangidaulo kadagiti pangukoman ti militar ken mabalinna ti mangipataw iti kadagsenan a dusa. Addaan iti grupo ti ad-adipen nga agserserbi kas katulongan. Mailasin ti saadna babaen iti kawesna: adda maysa a purpura a garit iti togana ken adda balitok a singsingna a mangipamatmat iti kinatan-ok. Adda idi tiempo a dagitoy a tribuno ket butosan dagiti umili; idi agangay, ti Senado ken dadduma pay a sibilian wenno kameng ti militar ti kangrunaan a makinrebbeng iti pannakadutokda. Gagangay a makalikaguman idi ti sangapulo a tawen a panagserbi iti impanteria wenno lima a tawen iti kabalieria. Impalubos ni Augusto a ti annak dagiti senador mangrugida nga agserbi kas tribuno. Ni laeng Tiberio ti makinkarbengan iti panangdutok.

Iti rambak ti panagkasangay ni Herodes, karaman dagitoy a komandante kadagiti madaydayaw a sangaili a rinagragsak ti sumasala a ni Salome. Iti imatang dagita a natatan-ok a tattao, napilitan ni Herodes a mangtungpal iti inkarina isu nga imbilinna a maputolan ni Juan a Manangbautisar. (Mr 6:21-26) Maysa a komandante ti militar (chiliarch) ti kadua dagiti soldado a nangaresto ken Jesus.​—Jn 18:12.

Idi agarup 56 K.P., ni Claudio Lisias ti komandante ti militar ti garison idiay Jerusalem. Isu ti nangispal ken Pablo manipud kadagiti bayanggudaw a managderraaw ken ti aggugulo a Sanhedrin ken isu ti nagsurat iti maysa a surat ti panangilawlawag agpaay ken Gobernador Felix idi sililimed a naipuslit ni Pablo a naipan idiay Cesarea. (Ara 21:30–24:22) Adu a komandante ti militar ti presente idi naidatag ni Pablo iti saklang ni Herodes Agripa II.​—Ara 25:23.

Nadakamat met “dagiti komandante ti militar” iti sirmata ni Juan, iti libro ti Apocalipsis, kas karaman kadagidiay pakaipakatan kadagiti panangukom ti Dios.​—Apo 6:15; 19:18.