KASILI

[Heb., sha·lakhʹ].

Dakkel a tumatayab iti danum a nagkakamang dagiti ramay ti sakana nga agtiliw iti ikan babaen ti panagbatok. Daytoy a tumatayab agparang laeng iti listaan dagiti narugit a tumatayab iti sidong ti Mosaiko a Linteg, listaan a mangiparit iti pannangan kadagiti tumatayab a kaaduan kadagita ket kangrunaanna dagiti tumatayab nga agsippayot ken mannangan iti agruprupsa a lasag. (Le 11:17; De 14:17) Intarusan dagiti managipatarus iti Griego a Septuagint a daytoy a tumatayab isu ti ka·tar·raʹktes, ti Griego a nagan maipaay iti kasili, idinto ta ti Latin a Vulgate aramatenna ti mergulus (ti “bumabatok”) a mangipatuldo iti daytoy a tumatayab. Ti kasili (Phalacrocorax) ket gagangay unay idiay Palestina, nangnangruna iti igid ti Kosta ti Mediteraneo ken kasta met iti sumagmamano a dandanum iti uneg ti pagilian a kas iti Baybay ti Galilea. Ti kasili ket kabagian dagiti tumatayab iti pamilia ti mangngaput. Kadawyan nga atiddog ti bagina ken nangisit ti marisna, ti kasili ket nasiglat ken naparagsit iti danum, nga aglangoy iti uneg ti danum kangrunaanna babaen ti panangaramat kadagiti nagkakamang a ramay ti sakana. Ti natirad, kimmaw-it a sippitna ti mamagbalin iti dayta a nalaing nga agkalap iti ikan, ket nanipud idi kadaanan a tiempo, dagiti kasili sinanay dagiti mangngalap iti Daya ken paspaset ti India tapno agtiliwda iti ikan maipaay kadagiti makinkukua kadakuada, a maikabil ti adda luklukayna a bedbed iti karabukob ti tumatayab tapno saanna a maalimon ti matiliwna malaksid iti babassit unay nga ikan.