KASIKO

Sukat iti kaatiddog nga agarup katupag ti distansia manipud siko agingga iti murdong ti pattungagan. (De 3:11) Adda dagiti pasimudaag a gagangay a nagusar dagiti Israelita iti kasiko nga agarup 44.5 cm (17.5 pul.), ket dayta ti nakaibatayan dagiti rukod a naaramat iti daytoy a publikasion. Ti Kitikit ti Siloam, kas pagarigan, ilanadna ti sukat a 1,200 a kasiko kas kaatiddog ti usok ti danum nga inaramid ni Ari Ezekias. Sigun kadagiti moderno a rukod, 533 m (1,749 pie) ti kaatiddog daytoy nga usok. Gapuna, no agkuenta maibatay kadagitoy a numero, ti sukat ti maysa a kasiko ket 44.4 cm (17.49 pul.). Kasta met, no masukat ti adu a patakder ken napaderan a luglugar a nakabakab idiay Palestina, ti rukodda ket buklen ti eksakto a numero (whole number) iti sukat a kasiko, a pakaibatayan met iti panangpattapatta nga agarup 44.5 cm (17.5 pul.) ti maysa a kasiko.

Nabatad a nagusar met dagiti Israelita iti dakdakkel a kasiko, nga at-atiddog iti sangadakulapan (7.4 cm; 2.9 pul.) ngem iti “kadawyan” a kasiko. Daytoy dakdakkel a kasiko nga agarup 51.8 cm (20.4 pul.) ket naitampok kadagiti rukod ti templo iti sirmata ni Ezequiel. (Eze 40:5) Mabalin nga adda met idi ababa a kasiko nga agarup 38 cm (15 pul.), a narukod manipud siko agingga kadagiti buko ti gemgem.​—Uk 3:16, Rbi8 ftn.