PAMMATIGMAAN, MANANGPATIGMAAN
Ti tao a mangipapaay iti balakad ket maysa a manangpatigmaan, wenno manangbalakad. Ti pammatigmaan isu ti balakad nga ipapaayna.
Kadagiti adu a Hebreo ken Aramaiko a sasao a naaramat iti Kasuratan a pangyebkas iti kapanunotan a “pammatigmaan,” masansan unay nga agparang ti Hebreo a nombre nga ʽe·tsahʹ ken ti nainaig a berbo a ya·ʽatsʹ. Nupay gagangay a naipatarus a “pammatigmaan,” ti ʽe·tsahʹ naipatarus met a “gandat.” (Isa 8:10) Iti Kristiano a Griego a Kasuratan, ti kapanunotan a “pammatigmaan” wenno “balakad” kas nombre ket nayebkas babaen iti bou·leʹ ken sym·bouʹli·on. Ti bou·leʹ naipatarus met a “gakat” (Lu 23:51), “gandat” (Ara 5:38), “nalawag a pagayatan” (Ara 13:36), ken ‘determinasion’ (Ara 27:42).
Gapuna, ti termino a “pammatigmaan” mabalin a mangipasimudaag met iti “pagayatan,” “panggep,” “determinasion,” “gakat,” kas idi indeklara ni Jehova: “Ti pammatigmaanko agtalinaedto.” (Isa 46:10) Dagiti “pammatigmaan ti puspuso,” awan sabali, dagiti plano, gakat, panggep, wenno determinasion, ti makin-uneg a kinatao—dagidiay ti maibutaktak inton umay mangukom ni Apo Jesu-Kristo. (1Co 4:5) Iti Efeso 1:11, ti sasao a “maitunos iti pamay-an nga ipatigmaan ti pagayatanna” (iti literal, “maitunos iti pammatigmaan ti pagayatanna”) mabalin a tarusan a kaipapananna ti “maitunos iti panggep, wenno determinasion, nga ebkas ti pagayatan ti Dios.” Kinuna ni apostol Pablo nga isu siwayawaya iti pannakabasol iti dara agsipud ta saanna a minedmedan ti panangisuro iti “isuamin a pammatigmaan ti Dios” (“ti intero a panggep ti Dios,” JB; “ti intero a pagayatan ti Dios,” NIV), awan sabali, isuamin a banag a napateg iti pannakaisalakan.—Ara 20:27.
Dagiti lallaki a pagaammo gapu iti siribda natagipateg unay kas naarian a manangpatigmaan wenno manangbalakad. (Kitaenyo ti 2Sm 16:23.) Gapu iti saadda, adda gundaway a naitukonanda iti pasuksok tapno aramatenda ti impluensiada iti rinuker a pamay-an. Idi a ti kabkabusor dagiti Judio nangtangdanda kadagiti manangbalakad, mabalin nga inaramidda ti kasta babaen ti panangpasuksokda kadagiti Persiano a nagserbi iti dayta nga akem.—Esd 4:5.
Awan uray maysa a tao nga agik-ikut iti isuamin a pannakaammo. Gapuna, masirib ti tao a mangipangag iti nasayaat a pammatigmaan. (Pr 12:15) Ti pananglaksid iti naimbag a pammatigmaan dagiti manangbalakad nga aduan kapadasan, kas iti inaramid ni Ari Rehoboam, ket nakaro a kinamaag.—1Ar 12:8.
Ni Jehova ti agik-ikut iti naan-anay a sirib. Isu laeng ti saan nga agkasapulan iti mamatigmaan kenkuana. (Isa 40:13; Ro 11:34) Kabaelan ti Anakna ti agakem kas “Nakaskasdaaw a Manangbalakad,” a mangipaay iti panangidalan ken panangiwanwan, agsipud ta immawat ken nangannurot iti pammatigmaan manipud iti Amana ken addaan iti espiritu ti Dios. (Isa 9:6; 11:2; Jn 5:19, 30) Ipaganetget daytoy a ti pammatigmaan masapul nga ikabilanganna ni Jehova tapno agbalin a makagunggona dayta. Ti aniaman a balakad a maisupiat iti Kangatuan ket awan pategna. Pulos a saan a maikuna a pammatigmaan dayta.—Pr 19:21; 21:30.