PANAGPASAYASAY

Maysa a termino iti Biblia a tumukoy iti kasasaad a mainaig iti mabagbagi ti lallaki ken babbai. (Le 15:2, 19, 25; Nu 5:2, 3; 2Sm 3:29) No iti lallaki, nainaig daytoy iti saan a nasalun-at a kasasaad nga adda banag nga agruar iti mabagbagi wenno maabbedan dayta. (Le 15:2, 3) Awan ti napalubosan a lalaki a putot ni Aaron a mangan iti “nasantuan a bambanag” bayat a narugit gapu iti panagpasayasay.​—Le 22:4.

No dadduma ti sao a “panagpasayasay” ket tumukoy iti regular ken normal a panagkadawyan ti babai. (Le 15:19-24) Nupay kasta, naaramat met daytoy a tumukoy iti napaut a panagpadara gapu iti sakit, ngarud maysa a di normal a panagbulos ti dara. (Le 15:25-30) Ti naud-udi a natukoy a panagpadara ket agaplikar iti nakaro a “panagbulos ti dara” a sinagaba ti maysa a babai iti uneg ti 12 a tawen sakbay nga inagasan ni Jesu-Kristo.​—Mt 9:20-22.

Sigun iti Linteg, narugit ti tao nga agpasayasay, ket amin nga aruaten ken tattao a masagidna agbalin a narugit. No sumardengen ti panagpasayasay gapu iti sakit, aramiden ti maysa tao dagiti espesipiko nga addang maipaay iti pannakagugor.​—Le 15; kitaenyo ti NADALUS, KINADALUS.