DISTRITO TI JORDAN

Ti gistay nagsirkulo a labneng, wenno arinduyog a lugar, a sadiay nga agayus ti Karayan Jordan. Daytoy iramanna ti makimbaba a paset ti Ginget Jordan, kas makita iti pannakadakamat ti “Distrito ti Jordan” mainaig iti ar-aramid ni Solomon a panagsukog iti gambang iti nagbaetan ti Succot ken Zaretan. (1Ar 7:46; 2Cr 4:17; idiligyo ti 2Sm 18:23.) Nupay kasta, “ti Distrito” agparang met nga aglayon agingga iti makin-abagatan nga ungto ti Natay a Baybay a nabatad nga ayan “dagiti siudad ti Distrito.” (Ge 13:10-12) Ngarud saanna laeng nga inraman ti ginget a tanap ti Jerico no di ket dimmanon agingga iti Zoar, ti siudad a nagkamangan ni Lot ken ti annakna a babbai.​—Ge 19:17-25; De 34:3.

Ipasimudaag ti naaramid a panagsirarak iti makin-abagatan nga ungto ti Natay a Baybay a ti dakkel a paset ti daga iti baba ti kasla dila ti langana a daga a naawagan Lisan ket inabbongan ti dandanum ti Baybay. Patien ti adu nga eskolar a “dagiti siudad ti Distrito” ket sipapalned iti daytoy a rehion. Maysa idi a “nasayaat-pannakapadanumna” ken umasping “iti minuyongan ni Jehova.” (Ge 13:10) Pudno daytoy saan laeng a maipapan iti rehion iti amianan ti Natay a Baybay, a sadiay ti Tantanap ti Moab ken wasis ti Jerico laeng ita ti mangtagtaginayon iti kinadam-eg unay, no di ket maipapan met iti makin-abagatan a paset ti Distrito. Uray ita ti tanap a nagsaad iti abay ti Lisan ket madesdeskribir kas “napalawa a wasis” a mabalin a pagmulaan iti sebada, trigo, datiles, ken ubas. Ti delta a rehion ti Karayan Zered, nga agayus nga agturong iti makin-abagatan nga ungto ti Natay a Baybay, ket maaw-awagan met iti “nabaknang a wasis.”