DISTRITO

Ti sao a “distrito” tumukoy iti maysa nga administratibo a benneg, maysa a rehion iti aglawlaw ti maysa a siudad, wenno maysa a rehion iti las-ud dagiti piho a pagbeddengan.

Idi inorganisar ni Nehemias ti pannakaibangon manen ti pader ti Jerusalem, nangituding iti bembenneg a tarimaanen dagiti panguluen, wenno ‘piprinsipe,’ ken dagiti agnanaed iti sumagmamano a “distrito.” Naipanagan kadagitoy a distrito ti nagan ti kangrunaan a siudadda, ket nagkadua ti sumagmamano a distrito (Jerusalem, Bet-zur, Keila). (Ne 3:9, 12, 14-18) Nabatad a dagitoy ket babassit a benneg ti Persiano a “masaksakupan a distrito,” wenno “probinsia,” ti Juda. (Ne 1:3; KJ, RS) Ti Hebreo a sao a pangawag kadagitoy a distrito (peʹlekh) maikunkuna a naadaw iti Akkadiano a sao a pilku, nalabit mangipasimudaag a dagiti taga Babilonia ti nangirugi kadagita kalpasan ti pannakarba ti Jerusalem.​—Kitaenyo ti MASAKSAKUPAN A DISTRITO.

Ti Hebreo a termino a kik·karʹ ipaawatna ti kapanunotan maipapan iti maysa a banag a nagbukel. Maus-usar dayta a pangtukoy iti “nagbukel a tinapay” (Ex 29:23), “nagsirkulo a kalub” a buli (Zac 5:7), “talento” a balitok wenno pirak (Ex 25:39; 1Ar 20:39), ken gistay nagsirkulo a “distrito” wenno “labneng.”​—Ge 13:10, Rbi8 ftn; Ne 12:28.

Iti Kristiano a Griego a Kasuratan, ti sao a hoʹri·on (kankanayon a pangadu ti pormana) literal a tumukoy kadagiti “beddeng” wenno “lindoras” ti maysa a geograpiko a lugar (Ara 13:50; Mt 19:1), ngem mabalin a tumukoy met iti daydiay natikub, awan sabali maysa a “distrito” wenno “rehion.” (Mt 2:16; 15:22) Ti termino a me·risʹ, maus-usar a pangtukoy iti “distrito” ti Macedonia iti Aramid 16:12, literal a tumukoy iti maysa a “paset.”​—Idiligyo ti Int; Ara 8:21.