EMMAUS

Ti purok a pagturturongan da Cleopas ken ti padana nga adalan idi a pagammuan ta kimmadua kadakuada ti naglasag a ni Jesu-Kristo idi aldaw ti panagungarna. Nupay kasta, sada laeng nailasin a ni Jesus idi nakadanondan idiay Emmaus ken “sisasadag idi a kaduada iti panganan.” Idi nagpukawen ni Jesus, nagsubli idiay Jerusalem ti dua nga adalan iti dayta met laeng a rabii. (Lu 24:13-33) Kunaen ni Lucas a ti purok ‘innem a pulo nga estadio’ (7.5 a Romano a milia [11 km; 7 mi]) manipud Jerusalem.

Nupay kasta, saan a masierto ti pakasarakan itan iti Emmaus, di kumurang nga innem a nagduduma a lugar ti naisingasing. Kalatakan kadagitoy ti ʽImwas nga adda iti dalan nga agturong iti Tel Aviv-Yafo. Ngem ti ʽImwas ket agarup 175 nga estadio (32 km; 20 mi) iti laud nga amianan-a-laud dayta a siudad, gistay mamitlo ti kaadayona iti dinakamat ni Lucas. Masansan met a maikunkuna nga isu ti Qalunyah (Mevasseret Ziyyon) a masarakan iti kangrunaan a dalan nga agturong iti Tel Aviv-Yafo ken inawat ti dadduma nga isu ti Ammaous a tinukoy ni Josephus, ket agarup 35 nga estadio (6.5 km; 4 mi) manipud Jerusalem, isu a nakaas-asideg met unay iti kasta saan a tumutop iti rekord ni Lucas. Gapuna, ad-adda a kunaen ti dadduma a ti Emmaus isu ti El-Qubeiba, nga adda iti dalan ti Roma a naam-amianan ngem iti dadduma a naisingasing a disso. Nasarakan ditoy dagiti tedtedda a naipagarup nga addan idi pay panawen ti Griego a Kasuratan. Ti kaaddana iti agarup 60 nga estadio (11 km; 7 mi) iti amianan a laud ti Jerusalem, pasingkedanna ti panangmatmat a mabalin a daytoy ti purok a nadakamat iti Biblia. Nupay kasta, saan a masierto ita ti pudpudno nga ayanna.