GANGRENA

Ti pannakatay dagiti tisyu iti maysa a paset ti bagi, kas iti maysa a saka wenno iti ramay ti saka, kas ibunga ti pannakaabbed ti panagrikus ti dara. Iti nagango a gangrena, nga iti dayta mabangenan wenno masullatan dagiti urat (kasla koma iti arteriosclerosis), lumitem ken aggango ti naapektaran a paset ket awanen a pulos mariknana. Ti nabasa a gangrena gagangay nga apektaranna dagiti amin a kita ti babassit unay nga urat. Iti lumlumteg a gangrena, dagiti bakteria nga adda iti natay wenno matmatay a tisyu mabalin a mangbukelda kadagiti lebbuak iti sirok ti kudil, a mangibunga iti napartak a panagleksab dagiti tisyu. Agsipud ta dagiti bakteria gagangay a naipakuyogda iti gangrena, ti ibungana nga impeksion masansan a papartakenna ti panagramaram ti ipapatay dagiti selula. No dagiti bakteria agwarasda iti dara nga agrikrikus iti bagi, ad-adda pay a pumeggad ti kasasaad, nga agbanag iti ipapatay malaksid no madagdagus a maipakat ti umno a panangagas.

Usaren ni apostol Pablo dayta a sao iti piguratibo a pamay-an mainaig iti sursuro ti ulbod a doktrina ken mainaig kadagiti “ubbaw a panagsasao a sumalungasing iti nasantuan.” Ipaganetgetna a ti kasta a panagsasao pagpeggadenna ti intero a kongregasion, a kunkunana: “Ta rumang-aydanto iti ad-adda pay a di kinanadiosan, ket ti saoda agsaknapto a kas gangrena.” Kalpasanna, mangdakamat kadagiti pagarigan: “Da Himeneo ken Fileto mairamanda kadakuada. Dagitoy met laeng a lallaki simiasida iti kinapudno, a kunkunada a napasamaken ti panagungar; ket iluluodda ti pammati ti sumagmamano.” (2Ti 2:16-18) Maigapu iti immun-una a simbolismo ni Pablo, a nangiladawan iti kongregasion kas maysa a bagi nga aduan kameng​—saksaka, im-ima, ken dadduma pay (1Co 12)​—ti piguratibo a panangusarna iti gangrena, agraman ti peggad nga ipaay dayta iti natauan a bagi, sibibileg nga ipaganetgetna ti kinapateg ti panangiwaksi iti ulbod a doktrina ken di nadiosan a panagsasao manipud kongregasion Kristiano.