GARAMI

Dagiti nagango nga ungkay ti bukbukel kas iti trigo ken sebada; iti Biblia, kangrunaanna dagiti tangkay a natedda kalpasan a nairingpas ti panagirik. Ti garami, agsolsolo wenno nalaokan iti sabali pay a pagpakan, nausar idi un-unana kas taraon maipaay kadagiti naamo nga animal. (Ge 24:25, 32; Uk 19:19; 1Ar 4:28; Isa 11:7; 65:25) Naaramat met ti garami iti panagpartuat kadagiti ladrilio. (Ex 5:7-18; kitaenyo ti LADRILIO.) Agparang dayta kadagiti mangiladawan a kasasaad mainaig iti pannakadadael dagiti nadangkes (Job 21:18) ken ti pannakaparukma ken pannakaipababa ti Moab. (Isa 25:10-12) Ti nabileg a Leviatan nailadawan a mangibilbilang iti landok a kasla garami laeng.​—Job 41:1, 27.