GAT-RIMMON

[Pagpespesan iti Ubas iti Abay ti Kayo a Granada].

1. Maysa a siudad ti Dan (Jos 19:40, 41, 45) a naituding kadagiti Cohatita a Levita. (Jos 21:20, 23, 24) Maibatay iti 1 Cronicas 6:66-70, ti Gat-rimmon ket kasla maysa a siudad ti Efraim. Nupay kasta, sigun iti pumadpada a salaysay iti Josue 21:23, 24, patien dagiti eskolar iti Hebreo a, gapu iti biddut ti eskriba, di inggagara a naikkat ken napukaw ti maysa a paset ti teksto. Gapuna, kunaenda a maipasngat ti sumaganad a sasao (tumupag iti Jos 21:23) sakbay ti 1 Cronicas 6:69: “Ket manipud iti tribu ni Dan, ti Elteque ken ti pagpaarabanna, ti Gibbeton ken ti pagpaarabanna . . . ” Mabalin a daytoy ti orihinal a mabasa iti teksto. Nupay kasta, saan koma a liplipatan ti posibilidad a ti Gat-rimmon ket maysa a naipasngat a siudad ti Dan iti uneg ti teritoria ti Efraim.

Kadawyan a maikunkuna a ti Gat-rimmon ket isu ti Tell Jerisheh (Tel Gerisa), agarup 8 km (5 mi) iti amianan a daya ti agdama a Tel Aviv-Yafo.

2. Maysa a siudad ti Manases a naited kadagiti Cohatita a Levita. (Jos 21:20, 25) Yantangay ti umasping a salaysay iti 1 Cronicas 6:70 dakamatenna ti “Bileam,” patien ti adu nga eskolar a sigud nga agparang ti Bileam imbes a Gat-rimmon iti Josue 21:25.​—Kitaenyo ti IBLEAM.