GETSEMANI

[Pagpespesan iti Lana].

Nalabit maysa a minuyongan dagiti kayo nga olibo nga addaan iti pagpespesan iti lana dagiti olibo. Masarakan ti Getsemani iti daya ti Jerusalem, iti ballasiw ti Ginget Kidron (Jn 18:1), idiay Bantay dagiti Olibo wenno iti asideg dayta. (Lu 22:39) Ditoy ti masansan a nagtataripnongan da Jesu-Kristo ken dagiti adalanna. (Jn 18:2) Idi rabii ti Paskua ti 33 K.P., napan ni Jesus a kaduana dagiti matalek nga adalanna iti daytoy a minuyongan tapno agkararag. Idi nasarakan ken liniputan ni Judas Iscariote, ni Jesus ket kinemmeg sadiay ti maysa nga armado a bunggoy dagiti managderraaw.​—Mt 26:36-56; Mr 14:32-52; Lu 22:39-53; Jn 18:1-12.

Saan a masinunuo ti eksakto nga ayan ti minuyongan ti Getsemani, agsipud ta (sigun iti pammaneknek ni Josephus) amin a kaykayo iti aglikmut ti Jerusalem ket napukan bayat ti pananglakub dagiti Romano idi 70 K.P. (The Jewish War, VI, 5-8, [i, 1]) Sigun iti maysa a nabayagen a patpatien, ti Getsemani ket nainaig iti minuyongan a tinikub dagiti Franciscano idi 1848. Agarup 46 por 43 m (150 por 140 pie) ti rukodna ken masarakan iti sakaanan ti Bantay dagiti Olibo, iti nagsangaan ti dalan iti makinlaud a darisdisna. Masarakan iti daytoy a minuyongan ti walo a kayo nga olibo nga addan sadiay iti adun a siglo.