ISRAEL TI DIOS
Daytoy a sasao, a maminsan laeng a masarakan iti Kasuratan, tumukoy iti naespirituan nga Israel saan ket nga iti puli a nagtaud ken Jacob, a ti naganna nasukatan iti Israel. (Ge 32:22-28) Sawen ti Biblia maipapan iti “Israel nga adda iti nainlasagan a pamay-an” (1Co 10:18), kasta met iti naespirituan nga Israel a buklen dagidiay saan a makalkalikaguman a nagtaudda ken Abraham. (Mt 3:9) No aramaten ni apostol Pablo ti sasao nga “Israel ti Dios,” ipakitana nga awan nakainaigan dayta iti panagbalin a nakugit a kaputotan ni Abraham wenno saan.—Ga 6:15, 16.
Impadto ni mammadto Oseas nga iti panangilaksid ti Dios iti nasion ti nainkasigudan nga Israel tapno maiwayaan daytoy a naespirituan a nasion, a pakairamanan dagiti Gentil, kunaenna “kadagidiay saanko nga ili: ‘Dakayo ti ilik.’” (Os 2:23; Ro 9:22-25) Iti naikeddeng a tiempo naikkat ti Pagarian ti Dios manipud iti nasion dagiti nainkasigudan a Judio ket naited iti naespirituan a nasion a mangpatpataud iti bungbunga ti Pagarian. (Mt 21:43) Iti kinaagpaysuanna, dagiti nainkasigudan a Judio nairamanda iti naespirituan nga Israel. Bin-ig a Judio ken proselita dagiti apostol ken dadduma pay nga immawat iti nasantuan nga espiritu iti Pentecostes idi 33 K.P. (agarup 120), dagidiay a nainayon iti dayta nga aldaw (agarup 3,000), ken dagidiay nainayon idi agangay iti bilang ti lallaki laeng a nagbalinda nga agarup 5,000. (Ara 1:13-15; 2:41; 4:4) Ngem uray pay kasta, kas panangdeskribir kadakuada ni Isaias, isuda ket “natda laeng” a naisalakan manipud iti dayta a naiwaksi a nasion.—Isa 10:21, 22; Ro 9:27.
Idetalye ti dadduma a kasuratan daytoy a banag. Iti pannakasip-ak ti sumagmamano a “nainkasigudan a sanga” ti piguratibo a kayo nga olibo, naisulbong dagiti “atap” a di Israelita a sanga, iti kasta awan ti panaglalasin kadagidiay ‘pudno a bin-i ni Abraham, dagiti agtawid mainaig iti maysa a kari.’ (Ro 11:17-24; Ga 3:28, 29) “Saan nga amin nga agtaud iti Israel pudpudnoda nga ‘Israel.’” “Ta isu saan a maysa a Judio no iti makinruar, uray ti pannakakugit iti lasag saan met a makinruar. No di ket isu maysa a Judio no iti uneg, ket ti pannakakugitna isu ti pannakakugit ti puso babaen ti espiritu.” (Ro 9:6; 2:28, 29) Ti nainkasigudan nga Israel napaay a mangpataud iti nakalikaguman a bilang, gapuna ti Dios “inturongna ti asikasona kadagiti nasion tapno mangala kadakuada iti ili a maipaay iti naganna” (Ara 15:14), a maipapan kadakuada naikuna, “Idi naminsan saankayo a maysa nga ili, ngem itan ket ili ti Dios.” (1Pe 2:10) Inadaw ni apostol Pedro daydiay naikuna iti nainkasigudan nga Israel ket inyaplikarna dayta iti daytoy naespirituan nga Israel ti Dios, a kinunana a dayta ket iti kinapudnona “maysa a napili a puli, maysa a naarian a kinapadi, maysa a nasantuan a nasion, maysa nga ili nga agpaay a naisangsangayan a sanikua.”—Ex 19:5, 6; 1Pe 2:9.
Ti 12 a tribu a nadakamat iti Apocalipsis kapitulo 7 tumukoy la ketdi iti daytoy naespirituan nga Israel gapu iti sumagmamano a nainkalintegan a rason. Ti listaan ti naespirituan nga Israel saanna a kapadpada daydiay adda iti Numeros kapitulo 1 maipapan iti nainkasigudan nga Israel. Kasta met a ti templo ken kinapadi iti Jerusalem ken amin a rekord dagiti tribu ti nainkasigudan nga Israel ket nadadaelen a naan-anay, napukawen iti agnanayon, nabayagen sakbay pay a nakita ni Juan ti sirmatana idi 96 K.P. Ngem ti napatpateg, inawat ni Juan ti sirmatana a nainaig dayta iti nadakamaten a paspasamak nanipud ken kalpasan ti Pentecostes 33 K.P. Iti lawag ti kakasta a pasamak, ti sirmata ni Juan maipapan kadagidiay agtaktakder iti nailangitan a Bantay Sion a kadua ti Kordero (a linaksid ti nainkasigudan nga Israel) ipalgakna a ti bilang daytoy naespirituan nga Israel ti Dios ket 144,000 a “nagatang . . . manipud iti sangatauan.”—Apo 7:4; 14:1, 4.