NABAL

[Nakuneng; Maag].

Maysa a nabaknang a Maonita nga addaan kadagiti karnero; nga idiay Carmelo ti Juda ti pangipaspastoranna ken pangpukpukisanna kadagiti arbanna. Ni Nabal ket pagaammo met kas maysa a Calebita, kayatna a sawen, kaputotan ni Caleb. Manmano a tattao iti Biblia ti nailadawan a nagdakes unay a kas ken Nabal. “Nagubsang ken dakes iti ar-aramidna”; “nalabes unay ti kinaawan kaes-eskanna a tao [anak ni Belial] a kasasao”; ‘supapakanna iti dakes kas pangsubad iti naimbag’; “adda kenkuana ti kinakuneng.”​—1Sm 25:2, 3, 17, 21, 25.

Dagiti arban ni Nabal nga agdagup iti 3,000 a karnero ken 1,000 a kalding ket sinalakniban dagiti tattao ni David manipud kadagiti buyot dagiti tulisan. Kalpasan nga impakita ni David ti kastoy a kinamanangngaasi ken saan met a pulos nangal-ala iti aniaman nga awan pammalubos, nagkiddaw ni David ken Nabal a mangipaay iti sumagmamano a material a tulong nga agpaay kenkuana ken kadagiti tattaona idi tiempo ti panagpukis kadagiti karnero, nga isu ti nayugalida a tiempo ti panagpadaya ken panagpadagus. Ngem “nangibugkaw [ni Nabal] kadagiti pammabalaw” kadagiti mensahero ni David ken pinapanawna ida nga ima-ima. Nagbuteng dagiti mismo a tattao ni Nabal iti mabalin nga aramiden ni David ngem maamakda a makisao ken Nabal maipapan iti dayta a banag. Ngem maysa kadakuada ti nangibaga iti asawa ni Nabal a ni Abigail. Idi agturturongen sadiay ni David, ta panggepna a papatayen ni Nabal, sinabet ni Abigail nga addaan iti naruay a sagsagut a taraon ken inumen ket impakaasina a saan koma nga agbasol iti panangibukbok iti dara ti asawana. Idi nagawiden ni Abigail, nasangpetanna ni Nabal a “kasta unay ti pannakabartekna,” isu nga impabigatna ti panangibagana ti pannakisaona ken David ken no kasano a dandanida natay amin gapu iti inaramid ni Nabal. Idin, ni Nabal “natay ti pusona iti unegna, ket isu nagbalin a kasla bato,” nalabit napasaranna ti maysa a kita ti pannakabibineg wenno ti nagbalin nga epekto dayta iti karirikna ni Nabal. (Idiligyo ti De 28:28; Sal 102:4; 143:4.) Kalpasan ti agarup sangapulo nga aldaw, ni Nabal ket pinapatay ni Jehova. (1Sm 25:2-38) Idi agangay, innala ni David kas asawana ti manakem ken natured a ni Abigail.​—1Sm 25:39-42; 27:3; 30:5; 2Sm 2:2; 3:3.