NICOLAS
[Manangparmek Kadagiti Umili].
1. Maysa kadagiti pito a kualipikado a lallaki nga inrekomenda ti kongregasion kadagiti apostol tapno madutokan a mangiwaras iti taraon, iti kasta masigurado nga agpapada ken patas ti pannakatrato dagiti Kristiano iti nagkauna a kongregasion ti Jerusalem kalpasan ti Pentecostes, 33 K.P. Kadagiti pito a nadutokan, ni Nicolas laeng ti naawagan kas “maysa a proselita a taga Antioquia,” a mangipasimudaag nga isu laeng ti saan a Judio kadakuada. Gagangay idi nga addaan dagiti Judio iti Griego a nagan.—Ara 6:1-6.
2. “Ti sekta ni Nicolas” (wenno dagiti Nicolaita) ket namindua a nakondenar kadagiti pito a surat kadagiti kongregasion a nailanad iti Apocalipsis kapitulo 2 ken 3. Nakomendaran ti “anghel” ti kongregasion ti Efeso gapu iti pananggurana ‘kadagiti aramid ti sekta ni Nicolas,’ a ginura met a mismo ni Kristo Jesus. (Apo 2:1, 6) Nupay kasta, adda sumagmamano a “mangsalsalimetmet a sititibker iti sursuro ti sekta ni Nicolas” iti kongregasion idiay Pergamo, isu a naidagadag kadakuada nga idianda dayta ken agbabawida.—Apo 2:12, 15, 16.
Malaksid iti naisurat iti Apocalipsis, awanen ti sabali pay nga ammo maipapan iti nakondenar a sekta ni Nicolas. Saan met nga ammo no ania dagiti ar-aramid ken sursuro dayta, wenno no kasano a timmaud daytoy. Ipasimudaag ti sasao nga “iti kasta” a naaramat kalpasan a mismo ti pannakatukoy ti imoral ken idolatroso nga ar-aramid dagiti Israelita kas imbunga ti “sursuro ni Balaam” (Apo 2:14, 15) a mabalin nga agpada ti sursuro ti “sekta ni Nicolas” ken ti “sursuro ni Balaam,” ngem nalawag a napagduma dagita iti Apocalipsis. Awan ti nabileg a rason a kunaen a dayta a sekta ket nainaig ken Nicolas a maysa a Kristiano a taga Antioquia (Num. 1) gapu ta is-isu laeng ti agnagan Nicolas iti Biblia, a kas iti inaramid ti sumagmamano a nagkauna a mannurat ti iglesia. Saan met nga umiso a kunaen a ti maysa a sekta dagiti apostata ket inaramatda ti nagan ni Nicolas tapno aglatak ti dakes nga aramidda. Nalabit daytoy a Nicolas ket maysa nga indibidual a saan a nailanad ti kinasiasinona iti Biblia, a ti naganna ti nayawag iti daytoy a dakes a sekta.