NICOPOLIS

[Siudad ti Panagballigi].

Maysa a siudad nga inkeddeng ni apostol Pablo a sadiay ti pangpalabsanna iti tiempo ti lam-ek bayat ti maysa kadagiti panagdaliasatna. Daytoy met laeng a lugar ti imbaga ni Pablo a papanan ni Tito. (Tit 3:12) Iti King James Version, adda nota a masarakan iti ngudo ti surat ni Pablo agpaay ken Tito a mangipakita a naisurat dayta “manipud Nicopolis ti Macedonia.” Nupay kasta, saan a masarakan dayta a nota kadagiti kadadaanan a manuskrito. Nabatad a saan nga idiay Nicopolis ti nangaramidan ni Pablo iti suratna, yantangay iparipirip ti Tito 3:12 nga awan pay idi sadiay no di ket inkeddengna laeng nga idiay ti pangpalabsanna iti tiempo ti lam-ek.

Kadagiti nadumaduma a kadaanan a siudad nga agnagan iti Nicopolis, ti Nicopolis iti Epirus nga adda iti maysa a peninsula iti makin-amianan a laud a Grecia ken agarup 10 km (6 mi) iti amianan ti Preveza ket maikanatad unay iti Nicopolis a natukoy iti Biblia. Yantangay nalatak dayta a siudad, nagsayaat la ketdi nga ideklara sadiay ni Pablo ti naimbag a damag, ken nalaka a papanan dayta da Pablo (nalawag nga adda idi idiay Macedonia) ken Tito (idiay Creta). Mabalin a naaresto ni Pablo idiay Nicopolis sa naipan idiay Roma maipaay iti maudi a pannakaibaludna ken iti pannakapapatayna.

Binuangay ni Octavian (Augusto) ti siudad ti Nicopolis kas panglaglagip iti panagballigi ti buyotna iti baybay (idi 31 K.K.P.) maibusor kada Antony ken Cleopatra iti kabangibang nga Actium. Ti inrugina nga Actiano a Paay-ayam kas pammadayaw iti dios a ni Apollo ket nagpaay met a panglaglagip iti daydi a panagballigi. Ti mismo a nagsaadan ti siudad ti nagkampuan idi dagiti Romano, ket iti disso a nagyanan ti tolda ni Octavian ti nangibangonanna iti maysa a templo agpaay iti dios a ni Neptuno. Sigun ken historiador Josephus, kaaduan kadagiti publiko a patakder iti siudad ket naibangon gapu iti pagayatan ken pinansial a tulong ni Herodes a Dakkel.​—Jewish Antiquities, XVI, 147 (v, 3).