FEATURE
Didios Dagiti Nasion
TI LINTEG ni Jehova a naited iti Israel imparitna ti panagaramid kadagiti imahen maipaay iti panagdaydayaw. Ti pudno a Dios maysa nga Espiritu, ket naan-anay a di maiparbeng ti panagaramid iti aniaman nga imahen a pangirepresentar Kenkuana. Maisupadi iti dayta, nakabakab ti adu nga imahen ti didios ti dadduma a kadaanan a nasion. Maibilang laeng dagitoy kas “aramid dagiti ima ti tao, kayo ken bato.” (De 4:28) Kas kunaen ti Biblia, “didiosda nga awanan pateg,” yantangay awananda kadagiti mata a makakita wenno kadagiti lapayag a makangngeg kadagidiay agdaydayaw kadakuada. (1Cr 16:26; Sal 115:4-8) Ita, relikia laengen dagita kadagiti museo. Nupay kasta, adu ti ipalgak dagitoy maipapan kadagiti nagtaudan dagiti narelihiosuan a patpatien a nasaknap ita.
Nangrugi idiay Babilonia dagiti na- relihiosuan a tinallo a dios. Iti daytoy a tapi a bato, nailadawan ti maysa a santuario ni Shamash a dios-init ti Babilonia, agraman dagiti simbolo ti maysa a kasta a tinallo a dios: ti bulan (maipaay iti dios a ni Sin), ti init (maipaay ken Shamash), ken maysa a bituen (maipaay ken Ishtar)
Ni Assur, ti kangrunaan a dios dagiti Asirio, nailadawan iti daytoy a kadaanan a selio kas addaan tallo nga ulo (iti ngatuen dagiti payak)
Nagdaydayaw dagiti Egipcio kadagiti tinallo a dios a kas kadagitoy. Ngato: Horus, Osiris, ken Isis. Kannawan: Isis, Horus, Nephthys
Kaar-arngi unay ti “Madonna ken anakna” iti Kakristianuan, napagdaydayawan ti imahen ti ina-ken-anak ti Egipto (ni Isis ken ti maladaga a ni Horus)
Nabayag pay sakbay ti panawen Kristiano, naibilang a sagrado ti crux ansata, ti krus ti Egipto
Ti serpiente ket naitampok iti panagdaydayaw. Ti maysa a gapuanan ti arte ti Egipto (makinkannigid unay) ipakitana ti dua a nagbinnallangan nga uleg nga ig-iggaman ti dios iti kannigid, maysa a dakkel nga uleg a nakaminminar iti ladawan, ken maysa nga uleg-ti-ulona a diosa a nakataliaw iti kannawan.
Ti Griego nga estatua ni Asclepius (kannigid) ket addaan met iti serpiente. Makapainteres, ipakita ti Biblia a nagaramat ni Satanas iti serpiente kas pannakangiwatna (Ge 3:1-15; Apo 12:9)
Ti sangapulo a saplit iti Egipto imbutaktakda ti kinainutil dagiti idolo a didios dayta. Ti umuna a saplit—idi a ti Nilo napagbalin a dara—imbabainna ni Hapi (makinkannigid iti ngato, ti dios ti Nilo). Ti diosa a ni Heqt, a mangibilbilang iti tukak kas sagrado (makintengnga iti ngato), saanna a natulongan dagiti Egipcio idi a ti maikadua a saplit inabbonganna ti daga kadagiti tukak. Ti ipapatay dagiti inauna iti maikasangapulo a saplit isu ti kakaruan iti amin, ta ti anak ni Faraon ket naibilang nga anak ni Amon-Ra, a nairepresentar babaen ti maysa a kalakian a karnero (makinkannawan iti ngato)