FEATURE
Tiro
TI PAKASARITAAN ti Tiro mangipaay iti nalatak a pagarigan ti kaitungpalan ti padto ti Biblia. Umuna, narba ti siudad iti kangrunaan a paset ti pagilian; kalpasanna nadadael ti isla a siudad. Agpada a naipadto dagitoy a pasamak.
MAPA: Tiro
Idi kaaldawan da David ken Solomon, adda nainggayyeman a relasion iti nagbaetan ti Israel ken Tiro. (1Cr 14:1; 1Ar 9:10, 11) Ngem pinagdaydayawan dagiti taga Tiro ti didios a da Melkart ken Astarte. Naipamaysa ti Tiro iti komersio. Bayat ti irarang-ayna, timmangsit. Nagbalin a nasupring ken Jehova, ket dagiti mammadto ni Jehova nagipadtoda iti didigra maipaay iti Tiro.
Ni Nabucodonosor II linakubna ti siudad. Manipud namilitariaan a panangmatmat, kalpasan ti adu a tawen mabalin a kasla barengbareng ti panangitultuloy. Ngem nagregget agingga a narba ti Tiro iti ngudo ti 13 a tawen, iti kasta intungpalna ti padto ti Biblia a nanginagan kenkuana kas mangparmek iti dayta.—Eze 26:7-12.
Idi agangay, impadto manen ni Zacarias ti pannakarebbek ti Tiro, ngem iti daytoy a gundaway maipaay iti isla a siudad. Tapno makadanon iti dayta, ni Alejandro a Dakkel intambakna dagiti rebba ti siudad iti kangrunaan a paset ti pagilian tapno makaaramid iti intambak a dalan; nangibangon kadagiti nagdadakkel a torre a panglakub. Nupay imbangon ti Tiro dagiti paderna nga 46 m ti kangatona (150 pie), natungpal ti padto.—Zac 9:3, 4; Eze 26:4, 12.
Buya ti Tiro manipud tangatang, agraman ti disso iti aglikmut ti intambak a dalan, a nagaburan unay itan
Dagiti sedro ti Libano. Ni Hiram nga ari ti Tiro inabastuanna iti sedro a kayo ti panangibangon iti templo idiay Jerusalem
Dagiti tagilako ti kadaanan a Tiro: marfil, lana, napapateg a metal, kaykayo, ken abel a natinaan iti nalabaga a purpura
Modelo ti maysa a kita ti barko a pagkomersio a nabatad nga inusar ti kadaanan a Tiro
Ni Melkart, maysa kadagiti dios ti kadaanan a Tiro, kas nailadawan iti maysa a sinsilio