OG

Mannakabalin nga Amoreo nga ari ti Basan (1Ar 4:19) nga inabak dagiti Israelita sakbay ti ibaballasiwda nga agturong iti Naikari a Daga. Maysa ni Og kadagiti higante a Refaim. Kinapudnona, ti rukod ti nagdakkelan a landok nga andasna (nalabit lungon a naaramid iti nangisit a bato ti bulkan) ket 4 por 1.8 m (13.1 por 5.8 pie). (De 3:11, Rbi8 ftn) Da Og ken Sihon inturayanda dagiti Amoreo iti daya ti Jordan. (De 3:13; 4:46, 47) Ti sakup ni Og ket manipud Bantay Hermon agingga iti Jaboc, teritoria iti daya ti Jordan a saklawenna ti 60 a nasarikedkedan a siudad ken adu nga il-ili iti away. (De 3:3-5, 8-10; Jos 12:4, 5; idiligyo ti Nu 21:23, 24.) Ti dua a kangrunaan a siudadna ket ti Edrei ken Astarot.​—De 1:4; Jos 13:12.

Naabak ni Og iti im-ima ti Israel idi agarinunosen ti 40-tawen a panagallaalla ti Israel, sakbay ti panagpakarsoda iti Tantanap ti Moab. Idi naparmekdan ni Sihon, nakidangadang ti Israel kadagiti puersa ni Og idiay Edrei ket naan-anay a pinagballigi ida ti Dios a mangtalipupos ken Og ken iti isuamin a buyotna sada tinagikua dagiti siudadna ken il-ilina. (Nu 21:33–22:1; De 3:1-13) Ti teritoria ni Og nagbalin a paset ti tawid ni Manases. (Nu 32:33; De 3:13; Jos 13:29-31) Gapu iti daytoy a panagballigi, nagamak dagiti agnanaed iti Canaan ken daytoy met ti namagtignay ken Rahab ken dagiti Gabaonita tapno makikappiada iti Israel iti kasta saanda a nairaman a natalipupos. (Jos 2:10, 11; 9:9, 10) Naparegta unay ti Israel iti dayta a panagballigi ket kanayon a malaglagip dayta uray pay kalpasan ti adu a siglo.​—De 31:4; Ne 9:22; Sal 135:10-12; 136:17-22.