PAFO

Maysa a siudad nga adda iti makinlaud a kosta ti isla ti Chipre. Kalpasan a nawanas ni Pablo ti intero nga isla a kaduana da Bernabe ken Juan Marcos, ditoy Pafo a nasabetda ti mangkukulam a ni Bar-Jesus (Elimas), a nangbusor iti panangasabada ken Sergio Paulo a prokonsul. Gapu itoy nga ibubusorna, binulsek ni Pablo iti namilagruan a pamay-an, nupay temporario laeng. Iti pannakakitana iti daytoy a pasamak, nakomberte ni Sergio Paulo ket nagbalin a Kristiano.​—Ara 13:6-13.

Dua a siudad ti Chipre ti addaan iti kastoy a nagan, “Daan a Pafo” ken “Baro a Pafo.” Idi sinarungkaran ni Pablo ti isla bayat ti umuna a panagdaliasatna kas misionero, ti Baro a Pafo​—ti siudad a natukoy iti salaysay iti Aramid​—ti kabesera idi dayta a probinsia ti Chipre nga iturturayan ti senado. Daytoy a siudad ket maipagarup nga isu dagiti rebba iti kadaanan a puerto ti Pafo, masarakan iti agarup 15 km (9 m) iti amianan a laud ti “Daan a Pafo” (Kouklia). Ti sangladan sadiay, a nagpaay kas base dagiti barko a pakigubat idi panawen dagiti Griego ken Romano, ti disso a nagluasan ni Pablo ken ti kakaduana idi naglayagda iti amianan nga amianan-a-laud nga agturong iti Perga idiay Asia Menor. Adda pay laeng ti tedtedda ti kadaanan a sasangladan idiay Pafo, kasta met ti rebrebba ti nadumaduma a publiko ken pribado a pasdek ken ti maysa a paset ti pader ti siudad.

Awan duadua a simmarungkar manen da Bernabe ken Marcos iti dayta a lugar idi agarup 49 K.P.​—Ara 15:36-39.