FEBE

[Nasin-aw; Nalawag; Naraniag].

Maysa a Kristiano a babai iti kongregasion idiay Cencrea idi umuna-siglo. Iti surat ni Pablo kadagiti Kristiano idiay Roma, ‘inrekomendana’ kadakuada daytoy a kabsat ken kiniddawna nga ipaayda kenkuana ti aniaman a kasapulan a tulong ta isu “nagbalin . . . a manangikanawa kadagiti adu, wen, kaniak a mismo.” (Ro 16:1, 2) Mabalin nga intulod ni Febe ti surat ni Pablo idiay Roma wenno kinuyogna daydiay nangitulod.

Ni Febe ket tinukoy ni Pablo kas “maysa a ministro iti kongregasion nga adda sadiay Cencrea.” Daytoy ti gapuna a tumaud ti saludsod no ania ti kaipapanan ti naakusar ditoy a termino a di·aʹko·nos (ministro). Ibilang ti dadduma a managipatarus a daytoy a termino ket opisial ti kaipapananna isu nga impatarusda dayta a “diakonesa” (RS, JB). Ngem awan urnos iti Kasuratan nga agbalin a ministerial nga adipen dagiti babbai. Ti patarus ni Goodspeed ibilangna a kadawyan ti kaipapanan daytoy a termino ket impatarusna kas “katulongan.” Nupay kasta, nabatad a tinukoy dayta ni Pablo mainaig iti panangisaknap iti naimbag a damag, ti Nakristianuan a ministerio, ken ibagbagana a ni Febe ket babai a ministro a naitimpuyog iti kongregasion idiay Cencrea.​—Idiligyo ti Ara 2:17, 18.

Nagserbi ni Febe kas “manangikanawa kadagiti adu.” Ti termino a naipatarus a “manangikanawa” (pro·staʹtis) ket addaan iti pamunganayan nga anag a “babai a manangsalaknib” wenno “manangsaranay,” iti kasta saanna laeng nga ipasimudaag ti kinaimbag no di ket panangtulong iti sabsabali nga agkasapulan. Mabalin met nga ipatarus daytoy a “babai a manangtulong.” Gapu ta siwayawaya a nakapagbiahe ken nakaipaay ni Febe iti napateg a panagserbi iti kongregasion, daytoy ti mangipakita a nalabit isu ket balo ken posible a nabaknang iti material. Gapuna, mausarna ti impluensiana iti komunidad nga agpaay kadagiti Kristiano a maak-akusaran iti dakes, nga indepdepensana ida babaen iti daytoy; wenno mabalin nga impapaayanna ida iti pagkamangan iti tiempo ti peggad, a nagserserbi kas manangsalaknib. Ti rekord ket saan a mangipaay kadagiti detalye.