FARPAR

Maysa kadagiti dua a “karayan ti Damasco” nga imbilang ni Naaman a nasaysayaat ngem iti “amin a dandanum ti Israel.” (2Ar 5:12) Ti panangdakamat ni Naaman iti Farpar kas maikadua mabalin nga ipasimudaagna a basbassit nga ayus dayta. Daytoy a karayan ket kadawyan a maikunkuna nga isu ti Nahr el-ʼAʽwaj. Malaksid iti Nahr Barada (naikuna nga isu ti Abana), dayta laeng ti agmaymaysa nga ayus iti lugar ti Damasco. Ngem ti kaadu ti danum ti ʼAʽwaj ket agarup maysa a kakapat ti kaadu ti danum ti Barada. Dagiti babbabassit nga ayus nga agkaykaysa a mangbukel iti ʼAʽwaj mangrugida kadagiti makindaya a darisdis ti Bantay Hermon ket agtitiponda iti agarup 30 km (19 mi) iti abagatan a laud ti Damasco. Manipud iti daytoy a disso, agsikkosikko ti karayan iti nauneg ken nabato a pagayusan agingga nga agawan iti nalutulot a disso iti abagatan a daya ti Damasco. Ti diretso a distansia a sinaklaw daytoy a karayan (agraman dagiti gubuayanna) ket agarup 64 km (40 mi).

Ti naibangon a kangrunaan a pangsupiat iti pakabigbigan a nadakamat iti ngato ket ti ʼAʽwaj iti kinapudnona saan a ‘karayan ti Damasco,’ yantangay agayus iti agarup 15 km (9.5 mi) ken nasursurok pay nga agturong iti abagatan dayta a siudad. Gapu itoy a rason, ti dadduma paboranda nga isu dayta ti Farpar iti Nahr Taura, maysa a sanga ti Nahr Barada. Nupay kasta, ti panangtukoy ni Naaman iti Damasco mabalin a ramanenna ti Tanap ti Damasco a lumasatan ti Nahr el-ʼAʽwaj.