RABBI

Ti awag a “Rabbi” ket naaramat a tumukoy iti “mannursuro,” kas aktual a kaipapananna. (Jn 1:38) Ngem sakbay ti pannakayanak ni Jesus, inaramat met dayta dagiti Judio kas awag ken maysa a mararaem ken nadayaw a titulo a kaipapananna “daydiay naindaklan nga apok; daydiay natan-ok nga apok.” Kasta a titulo ti kayat ti dadduma a nangato ti adalna a tattao, kas kadagiti eskriba ken mannursuro iti Linteg. Naragsakanda a maawagan iti nadayaw a titulo a “Rabbi.” Kinondenar ni Jesu-Kristo ti kasta a panagtarigagay iti titulo ket imbagana kadagiti pasurotna a saanda koma a maawagan iti “Rabbi,” yantangay isu ti mannursuroda.​—Mt 23:6-8.

Ti termino a “Rabbi” ket nausar iti Biblia iti Kristiano a Griego a Kasuratan. Naminsangapulo ket dua a naaramat dayta mainaig ken Jesus, kas aktual a kaipapanan ti “Mannursuro”: namindua nga inaramat ni Pedro (Mr 9:5; 11:21), naminsan nga inusar ti dua nga adalan ni Juan (Jn 1:38), inaramat met ni Natanael (Jn 1:49), kasta met ni Nicodemo (Jn 3:2), namitlo nga inusar dagiti adalan ni Jesus a saan a nadakamat ti naganda (Jn 4:31; 9:2; 11:8), inaramat pay dagiti bunggoy (Jn 6:25), ken namindua nga inaramat ni Judas (naulit iti maysa a gundaway) (Mt 26:25, 49; Mr 14:45). Ni Jesus ket inawagan ni Maria Magdalena iti “Rabboni” (Mannursurok), kasta met ti maysa a bulsek a lalaki a pinaimbag ni Jesus. Nupay kasta, napukaw ti naisangsangayan a kaipapanan ti letra (i) iti ngudo daytoy a titulo, gapu ta “Mannursuro” laengen ti inusar ni Juan. (Jn 20:16) Ni Juan a Manangbautisar ket naminsan a naawagan iti Rabbi.​—Jn 3:26.