SEBNA(H)

[mabalin a napaababa a porma ti Sebanias].

Maysa nga opisial ni Ari Ezekias. Iti maysa a tiempo, ni Sebna ti “mayordomo . . . iti balay,” maipagarup a ti balay ni Ezekias​—maysa a naimpluensia a saad. Nupay kasta, imbilin ni Jehova ken Isaias a kondenarenna ni Sebna ken ipadtona a ‘mapagtalaw iti saadna,’ nalabit gapu iti kinapasindayagna ken panagsapsapulna iti dayaw, a naiparangarang iti panangibangonna iti bukodna a naranga a tanem. Ti nagayad a pagan-anayna, sintasna, ken ti saadna, agraman iti “tulbek ti balay ni David,” ket naited iti ‘adipen ti Dios a ni Eliakim.’​—Isa 22:15-24.

Nupay kasta, saan a naikkat amin a pribilehio ni Sebna ta idi impangta ni Senaquerib ti Jerusalem idi 732 K.K.P. ken nagbalin a mayordomo ni Eliakim, ni Sebna ti naarian a sekretario a naibaon a kadua ni Eliakim ken ti agilislista tapno makisaoda ken Rabsaque. Rinay-abda dagiti kawesda ket impadamagda ken Ezekias ti kinuna ni Rabsaque ket kalpasanna naibaonda ken Isaias tapno agimtuod ken Jehova.​—2Ar 18:18–19:7; Isa 36:3–37:7.