SEBRA

[Heb., peʹreʽ].

Maysa nga animal iti pamilia ti kabalio; a ti langa ken kababalinna ket umar-arngi iti atap nga asno, nupay nalaka a mailasin no idilig iti asno gapu kadagiti nangisit a garitna. Saan a nalawag a makita ti pudno a sukog ti sebra gapu kadagiti garitna, nga uray pay ti nasiput a matmata dagiti katutubo ket masansan a saanda a madmadlaw ti kaadda ti sebra iti kaadayo nga 40 wenno 50 m (130 wenno 160 pie). Masalakniban ti sebra manipud kadagiti animal a mangmangan iti padada nga animal gapu iti napigsa a panagkita ken panagangotna, kasta met iti napartak a panagtarayna. Naipadamag a makapagtaray ti animal iti 64 km/oras (40 mko) kalpasan ti damo a buelona. Kasta met, epektibo a pangdepensana dagiti kuko ken ngipenna.

Ti sebra ket atap nga animal a narigat a paamuen. (Job 24:5; 39:5; Isa 32:14) Kangrunaanna a ruruot ti taraon dagiti sebra. (Job 6:5; Jer 14:6) Kanayon nga uminumda tapno mapedped ti wawda (Sal 104:11) ket manmano nga umadayoda iti nasurok a 8 km (5 mi) manipud iti danum.

Ti kinasubeg ken ti nakaro a rugso ti agmaya a kabaian a sebra ket nausar a mangiladawan iti di mapengpengdan a kababalin ken pannakikamalala ti nasukir nga Israel. (Jer 2:24; Os 8:9) Impadto ti anghel ni Jehova a ti anak ni Abraham a ni Ismael ket agbalin a “sebra ti maysa a tao.” Nalabit tumukoy daytoy iti narungsot ken di mapengpengdan a kababalin, kas iparipirip ti sasao a: “Ti imana maibusorto iti tunggal maysa.”​—Ge 16:12.

Ti “onager” ken ti “atap nga asno” ket sabali pay a mayanatup a patarus ti Hebreo a peʹreʼ.​—Job 6:5, Rbi8 ftn.