PAKAYAPONAN DAGITI KARNERO

Natikub a disso a gagangay a pakaipanan dagiti karnero iti rabii tapno masalakniban manipud kadagiti mannanakaw ken kadagiti mannibrong nga animal. Nupay naaramat met dagiti rukib ken dadduma pay a nainkasigudan a salinong, masansan a dagiti pakayaponan dagiti karnero ket permanente a kulongan a nadidingan iti batbato (Nu 32:16; 1Sm 24:3; Sof 2:6) ken addaan iti ruangan. (Jn 10:1) Kas kadagidi kulongan iti nabiit pay, nalabit nasapawan iti sangsanga ti nasiit a mulmula ti ngatuen dagiti diding a batbato. Mabalin nga adda met nababa ken nalantag a patpatakder iti natalged a paset ti kulongan, a pakailinongan dagiti karnero no dakes ti paniempona. Nupay mabalin a pagkakaduaen dagiti arban ti nagduduma a pastor iti maymaysa a pagyaponan, saan a parikut no kasano nga ilasin ti tunggal arban. Agtungpal dagiti karnero iti timek laeng dagiti mismo a pastorda. Maysa nga agay-aywan iti ruangan ti agyan iti pagserkan ti pakayaponan dagiti karnero ket iti bigat ilukatanna dagiti pastor.​—Jn 10:2-4.