Kapitulo 80

Dagiti Pakaiyaponan ti Karnero ken ti Pastor

NI Jesus dimteng idiay Jerusalem maipaay iti Piesta ti Panangidaton, wenno Hanukkah, maysa a piesta a mangramrambak ti panangidaton manen iti templo ken Jehova. Idi 168 K.K.P., agarup 200 a tawtawen a nasapsapa, pinarmek ni Antiochus IV Epiphanes ti Jerusalem ket binastosna ti templo ken ti altarna. Nupay kasta, tallo a tawen iti kamaudiananna nabawida ti Jerusalem ket ti templo naidaton manen. Kalpasanna, naangay ti tinawen a panangrambak ti panangidaton.

Daytoy a Piesta ti Panangidaton ket maang-angay iti Chislev 25, ti bulan a Judio a katupag ti maudi a paset ti Nobiembre ken umuna a paset ti Disiembre iti moderno a kalendariotayo. Gapuna, nasurok laengen bassit a sangagasut nga al-aldaw ti nabatin agingga iti nakaay-ayat a Paskua ti 33 K.P. Gapu ta daytat’ tiempo ti kalamiisna, inawagan dayta ni apostol Juan ti “tiempo ti kalam-ekna.”

Ita agusar ni Jesus ti ilustrasion a dinakamatna dagiti tallo a pakaiyaponan ti karnero ken ti akemna kas ti Naimbag a Pastor. Ti umuna a pakaiyaponan ti karnero a sinaona ket nainaig iti urnos ti Mosaiko a Linteg ti tulag. Ti Linteg nagserbi kas alad, a mangisina kadagiti Judio manipud kadagiti makarugit nga ar-aramid dagidiay a tattao nga awan iti daytoy espesial a pannakitulag iti Dios. Inlawlawag ni Jesus: “Pudno, pudno kunak kadakayo, Ti saan a sumrek iti ruangan ti pakaiyaponan dagiti karnero no di ket kumalay-at iti sabali a dalanan, isu met laeng ti mannanakaw ken tulisan. Ngem ti sumrek iti ruangan, isu ti pastor dagiti karnero.”

Dadduma immayda ket kunada nga isudat’ Mesias, wenno Kristo, ngem saan nga isudat’ pudno a pastor nga intuloy a sinao ni Jesus: “Isu ti ilukatan ti agay-aywan iti ruangan, ket dagiti karnero denggenda ti timekna, ket ayabanna dagiti karnerona kadagiti nagnaganda, ket iruarna ida. . . . Ngem ti dida am-ammo saandanto a suroten no di ket itarayandanto ta dida am-ammo ti timekna.”

Ti “agay-aywan” ti umuna a pakaiyaponan ti karnero isu idi ni Juan a Mammautisar. Kas agay-aywan, ni Juan ti ‘nanglukat’ ken Jesus babaen ti panangipabigbigna kenkuana kadagidiay simboliko a karnero nga iturongnanto iti pagipastoran. Dagitoy a karnero nga aw-awagan ni Jesus babaen iti nagan ken iruarna maadmitardanto iti agangay iti sabali manen a pakaiyaponan, kas ilawlawagna: “Pudno, pudno kunak kadakayo, siak ti ruangan dagiti karnero,” kayatna a sawen, ti ruangan ti baro a pakaiyaponan. Inton iyusuaten ni Jesus ti baro a tulag kadagiti adalanna ken manipud langit ibuyatnanton ti nasantuan nga espiritu kadakuada iti sumaganad a Pentecostes, maadmitardan iti daytoy baro a pakaiyaponan.

Iti ad-adda a panangilawlawagna iti akemna, kuna ni Jesus: “Siak ti ruangan; ti sumrek a magna kaniak maisalakanto, ket sumrek ken rummuarto ket makasarakto ti pagaraban. . . . Siak immayak tapno maaddaanda ti biag ken tapno maaddaanda ti nawadwad unay. . . . Siak ti naimbag a pastor, ket ammok dagiti kukuak ket dagiti kukuak ammodak, a kas ti Ama am-ammonak, kasta met siak am-ammok ti Ama; ket itedko ti biagko maipuon kadagiti karnerok.”

Iti nabiit pay, liniwliwa ni Jesus dagiti pasurotna, a kunkunana: “Dikay agbuteng, bassit nga ipastoran, ta nagayatan ni Amayo nga ited kadakayo ti pagarian.” Daytoy bassit nga ipastoran, nga iti agangay addanto bilangda a 144,000, umayda iti daytoy a baro, wenno maikadua, a pakaiyaponan ti karnero. Ngem intuloy a kinuna ni Jesus: “Adda met sabsabali a karnerok a saanda a naitipon itoy a pagtaraknan; dagidiay masapul nga iyegko, ket denggendanto ti timekko, ket addanto maymaysa nga arban, ken maymaysa a pastor.”

Yantangay dagiti “sabsabali a karnero” ket “saanda a naitipon iti daytoy a pagtaraknan,” addada ngarud iti sabali a pagtaraknan, ti maikatlo. Dagitoy a naudi a dua a pagtaraknan, wenno kulongan dagiti karnero, addaandat’ nagduduma a pagtungpalan. Ti “bassit nga ipastoran” iti maysa a pagtaraknan makipagturaydanto a kadua ni Kristo idiay langit, ket dagiti “sabsabali a karnero” iti sabali a pagtaraknan agbiagdanto iti Paraiso a daga. Kaskasdi, agpapan pay addada iti dua a pagtaraknan, dagiti karnero ket awan panagiinnimunda, ken awan mariknada a panagsisina, ta kas kinuna ni Jesus, agbalindanto a “maymaysa nga arban” iti sidong ti “maymaysa a pastor.”

Ti Naimbag a Pastor, a ni Jesu-Kristo, situtulok a nangited ti biagna nga agpaay kadagiti dua a pakaiyaponan dagiti karnero. “Iyawatko [ti biagko] a sisiak,” kinunana. “Adda pannakabalinko a mangyawat ti biagko, ken adda pannakabalinko met a mangawat manen. Daytoy a bilin inawatko ken Amak.” Idi kinuna ni Jesus daytoy, naaramid ti panagsusupadi kadagiti Judio.

Adu iti bunggoy ti nagkuna: “Adda sairona ket mauyong. Apay-apay denggenyo?” Ngem dadduma kinunada: “Dagitoy saanda a sao ti adda sairona.” Kalpasanna, a nalawag tuktukoyenda manen ti panangpaimbagna ti lalaki a naiyanak a bulsek dua a bulan ti napalabasen, innayonda: “Kabaelan aya ti sairo a luktan dagiti mata dagiti bulsek?” Juan 10:1-22; 9:1-7; Lucas 12:32; Apocalipsis 14:1, 3; 21:3, 4; Salmo 37:29.

▪ Ania ti Piesta ti Panangidaton, ken kaanot’ pannakaselebrarna?

▪ Ania ti umuna a pakaiyaponan ti karnero, ken asino ti agay-aywan?

▪ Kasano a ti agay-aywan inlukatanna ti Pastor, ket iti ania ti nakaadmitaran dagiti karnero kalpasanna?

▪ Asinot’ mangbukel kadagiti dua a pagtaraknan ti Naimbag a Pastor, ken mano nga arban ti pagtungpalandanto?