KARASAEN
[Heb., ʼeph·ʽehʹ; tsiph·ʽo·niʹ; Gr., eʹkhi·dna].
Nagita nga uleg nga addaan kadagiti naisangsangayan unay a saong a mapikon nga agpauneg a dumket iti ngadas ti ngiwat no saanda a maus-usar. Nagduduma ti gita dagiti karasaen sigun kadagiti kakikitada, a ti sumagmamano kadagita adda idiay Palestina. Ti maysa kadagiti kapeggadan isu ti karasaen iti kadaratan (Vipera ammodytes) ti Ginget Jordan. Ti sabali pay a kita isu ti karasaen ti Palestina (Vipera palaestina). Ti Hebreo nga ʼeph·ʽehʹ gagangay a mainanaig iti Arabiko nga ʼafʽan, a tumukoy iti carpet viper, maysa a nagita nga uleg iti kadaratan a tantanap ti Jerico.
Ti kinabileg ti sabidong ti karasaen naiparipirip iti Job 20:16, a sadiay sawen ni Zofar “ti dila ti maysa a karasaen” kas addaan pannakabalin a mangpapatay. Idi narba ti barkoda iti isla ti Malta, bayat a mangum-ummong ni apostol Pablo iti sangareppet a ruting ken ikabkabilna ida iti apuy, rimmuar ti maysa a karasaen ket kimpet iti ima ni Pablo. Nupay kasta, ni Pablo “inwagsina ti nagita a parsua iti apuy ket saan a nadangran,” nupay dagiti nakamattider a tattao pinadpadaananda a lumteg nga agebbal ni Pablo wenno kellaat a matay.—Ara 28:3-6.
Mangiladawan nga Usar. Ti napeggad a kagat ti karasaen naaramat iti mangiladawan a pamay-an iti Proverbio 23:32, a pangdeskribiran ti masirib a tao kadagiti epekto ti nalabes a panagusar iti arak, a kunkunana: “Kumagat dayta a kas iti serpiente, ket agparuar iti sabidong a kas iti karasaen [Heb., u·khetsiph·ʽo·niʹ].” Iti panangdeskribirna iti kinadakes nga inaramid ti Israel nga ili ti Dios, insurat ni mammadto Isaias: “Dagiti itlog ti nagita nga uleg isu ti pinessaanda . . . Ti asinoman a mangan kadagiti itlogda matay, ket ti itlog a nalusit mapessaan nga agbalin a maysa a karasaen.” (Isa 59:5) Agitlog ti kaaduan nga uleg, ket nupay kaaduan kadagiti karasaen saan a mangngitlog (agitlog), adda dagiti kita nga agitlog.
Ni Juan a Manangbautisar inawaganna dagiti Fariseo ken Saduceo iti “putot dagiti karasaen.” (Mt 3:7; Lu 3:7) Ket ni Jesu-Kristo inawaganna dagiti eskriba ken Fariseo iti “putot dagiti karasaen” gapu iti kinadangkesda ken ti makapapatay a naespirituan a panangdangran a maipaayda kadagiti inosente a tattao.—Mt 12:34; 23:33.