ZAQUEO

[manipud Hebreo, mabalin a nagtaud iti sao a kaipapananna ti “nadalus; nasin-aw”].

Maysa a panguluen nga agsingsingir iti buis idiay Jerico a nagbalin a maysa kadagiti adalan ni Kristo. Kas opisial nga addaan iti kasta a saad, mabalin a ni Zaqueo ti nangidaulo iti dadduma pay nga agsingsingir iti buis iti Jerico ken iti lugar nga adda iti aglikmut. Ti distrito iti aglikmut ti Jerico ket nadam-eg ken nabunga, isu nga adu a buis ti mapastrek kas resulta ti komersio. Kas kaugalian ti kaaduan nga agsingsingir iti buis, nalabit adda dagiti mapagduaduaan nga inaramid ni Zaqueo maigapu iti saadna tapno maurnongna ti paset ti agdindinamag a kinabaknangna, agsipud ta talaga a “nabaknang.”​—Lu 19:1, 2, 8; kitaenyo ti AGSINGSINGIR ITI BUIS.

Idi napan ni Jesus idiay Jerico idi primavera ti 33 K.P., sakbay ti ipapanna idiay Jerusalem ken ti ipapatayna, kayat ni Zaqueo a makitana ni Jesus. Ngem saanna a makita iti bunggoy ti tattao gapu ta pandek. Iti kasta, nagtaray a napan iti masungad ket kimmalay-at iti kayo tapno padaananna ni Jesus. Siempre, daytoy a panaginteres ni Zaqueo ti namagsiddaaw ken Jesus ket imbaga ni Jesus a makipagyan kenkuana bayat nga adda iti Jerico. Nupay kasta, simmupiat dagiti umili, a kinunada a makigaygayyem ni Jesus kadagiti managbasol. Tapno maipakita ni Zaqueo a nagbalbaliwen ti kababalinna, kinunana nga isublina ti mamimpat a kaadu ti aniaman a di nainkalintegan a nagun-odna ken itedna kadagiti napanglaw ti kagudua dagiti sanikuana. Kalpasan dayta, kinuna ni Jesus a maikari a maisalakan ti sangakabbalayan ni Zaqueo. (Lu 19:3-10) Kasta met nga idi simmarungkar ni Jesus ken Zaqueo, dinakamatna ti pangngarig maipapan kadagiti mina.​—Lu 19:11-28.