ZERUIA

[mabalin a nagtaud iti sao a kaipapananna ti “balsamo”].

Kabsat a babai ni Ari David wenno kabsatna iti ina; ti ina da Joab, Abisai, ken Asael. Naikuna a ti kabsat ni Zeruia a ni Abigail ket “anak a babai ni Nahas,” nupay saan a direkta a nadakamat a kasta ni Zeruia. (2Sm 17:25) Naikuna met a da Zeruia ken Abigail ket ‘kakabsat a babbai’ ti annak a lallaki ni Jesse. (1Cr 2:16) Gapuna, posible nga annak ida ti asawa ni Nahas, a dayta a babai ti nagbalin nga asawa ni Jesse idi agangay, no kasta kakabsat laeng ida ni David iti ama. (Kitaenyo ti ABIGAIL Num. 2; NAHAS Num. 2.) Nabatad nga adayo nga in-inauna ni Zeruia ngem ni David, ta dagiti annakna ket kasla kasadaran ni David. Ti nagan ni Zeruia ket gagangay a nainaig iti tallo nga annakna, a mamaingel a mannakigubat a nagserbi ken David. (2Sm 2:13, 18; 16:9) Ti kakaisuna a nakadakamatan ti ama dagitoy a lallaki ket idi naitabon idiay Betlehem.​—2Sm 2:32.