Dagiti Natarnaw Idiay Argentina Nagunggonaanda
BAYATEN iti nasurok a 30 a tawtawen, dagiti Saksi ni Jehova idiay Argentina nasarakanda a kasapulan ti panangibanagda iti ar-aramidda iti Pagarian iti sidong iti adu a rigrigat. Nupay kasta, kanayon a tinaginayonda ti Nakristianuan a neutralidad, liniklikanda ti aniaman a kita iti idolatria ken sinurotda ti Biblia kadagiti amin a sabsabali a pamay-an. (Juan 17:16; Exodo 20:4-6; 1 Juan 5:19) Intultuloyda met ti panangaramid iti trabaho ti Dios ket intandudoda dagiti nalinteg a prinsipio iti Saona. Ti simamatalek a panagibtorda nagunggonaan idi a naikkanda iti opisial a pannakabigbig kas maysa a relihion idi Marso 9, 1984.
Siraragsak, ti agdama a gobierno ti Argentina nalawlawaganen ti panangmatmatna kadagiti Saksi ken dagiti Nainkasuratan a takderda. Iti panangbigbig iti kasasaad a kas maysa a relihiuso nga organisasion ken babaen iti panangraem iti wayawaya iti panagdayaw, dagiti annak dagiti Saksi ni Jehova di pay nabayag nailaksidda iti pannakipaset kadagiti patriotiko a seremonia. Ti makapainteres iti daytoy a banag isu ti sumaganad a report a nagparang iti nalatak a pagiwarnak a La Nacion, iti Buenos Aires, idi Agosto 18, 1984:
“Pannakailaksid kadagiti Paglintegan iti Eskuelaan Maipaay iti Panangdayaw Iti Bandera”
“Maipaay kadagiti relihiuso a rason, dagiti estudiante kadagiti establisimiento ti panangisuro a naipasdek a maipaay iti pannakaitandudo iti panangisuro iti panangibayog ken panangibaba iti bandera mabalinda a laksiden daytoy a dayaw, sigun iti maysa a resolusion iti Ministry of Education and Justice, a pinirmaan ni Dr. Carlos Alconada Aramburù.
“Daytoy baliwanna ti maudi a parapo iti punto a ‘National Flag’ B 2 iti resolusion No. 1635/78, isu a nagkuna: ‘Dagiti estudiante saanda a mabalin a laksiden daytoy a dayaw (pannakatuding a mangawit, mangibayog ken mangibaba iti emblema iti pagilian) a maipaay iti relihiuso a rason wenno maipaay iti aniaman a sabali a rason a mabalin a makalikaguman kadakuada.’
“Iti kastoy a pamay-an, adut’ maliklikan a parparikut, isu a timmaud kadagiti adu nga eskuelaan a pageskuelaan dagiti estudiante a miembro iti relihion a mangiparit ti panangdayaw kadagiti emblema a saan a naipamaysa a mangirepresentar iti Dios, wenno basta mangikasaba kas basol amin a panagdayaw iti ladawan wenno dagiti naindagaan a simbolo.
“Ti ministerial a resoiusion espisipiko ti panangibagana a ti panagkedked iti daytoy nga aramid ti masapul a maibatay ‘kadagiti prinsipio a taktakderan ti aniaman a relihion wenno kulto a bigbigen ti estado ken naisurat iti National Ministry of Foreign Relations and Worship’ ket saklawenna ti aplikasion iti pagalagadan ‘a maipaay iti pannakadayaw, panangiparang ken panangawit iti National nga Emblema, insignia ken dagiti simbolo nga addaan kadagiti kolor iti pagilian, ken ti panagkanta iti National nga antipona.’
“Kamaudiananna, ti ministerial a resolusion No. 1818 itudona a ‘daytoy a kasasaad maiyaplikarto, no la ket ta ti kababalin ti saan a panangaramid iti dayta ket nadayaw ken pribado ken saan a mangtignay iti pannakaiparangarang iti basol, pannakapabain, pannakarurod wenno pannakalais.’”
Iti dayta met laeng a petsa, ti pagiwarnak iti Buenos Aires a Clarin nangaramid iti kasta met laeng a report iti sidong ti paulo a “More Respect for Freedom of Worship,” ket innayonna pay:
“Aniaman a Banag a Di Makapabain”
“Iti daytoy a kaso, ti resolusion ti ministry iyebkasna a ti pakaibatayan maiyaplikar malaksid ta ti panagkedked a panangaramid iti dayta ket nadayaw, pribado ken saanna a ramanen ti pannakapabain, panagbasol, pannakarurod wenno pannakalais.
“Iti isu met laeng a linteg, ti resolusion No. 1635 idi 1978 nawaswas isu a naipasdek nga awan ti estudiante a mabalin a manglaksid kadagiti ar-aramid ken panangidayaw a nadakamat babaen ti panangipambarna iti relihiuso wenno dadduma a rason.
“Ti nawaswas a resolusion ti naulit-ulit a nasuppiat, nangnangruna babaen kadagiti paspasurot dagiti Saksi ni Jehova, a gapu iti panagraemda iti relihionda, agkedkedda a mangdayaw iti simbolo iti aniaman a pagilian.
“Daytoy a panangsuppiat ti nangpataud kadagiti adu a panagdadangadang bayat iti namilitaran a panagturay agsipud ta dagiti estudiante a mangsurot iti daytoy a pagalagadan naikkatda manipud kadagiti eskuelaan, agingga a nagapelarda kadagiti nababbaba a korte.
“Kasta met, dagiti paspasurot daytoy a sekta nasentensiaanda iti pannakabalud babaen kadagiti namilitaran nga autoridad bayat iti panawen manipud 1976/1983 agsipud ta ibilangda daytoy a pananginsulto wenno pananglais iti nasion a nangipaay kadakuada kadagiti umuna a panagadal ken kadagiti dadduma a kaso kadagiti nangatngato a tukad.”
Nasayaat a paliiwen daytoy a pammaneknek iti panagraem a maipaay iti wayawaya iti panagdayaw. Ket dagiti kakasta nga addang a kas kadagitoy, pudno, a napaneknekan a naindaklan a gunggona maipaay kadagiti nangsalimetmet iti kinatarnawda a saksi ni Jehova idiay Argentina.