Report dagiti Manangiwaragawag ti Pagarian
Sangalubongan a Panagrang-ay ti Pagarian
UMISO la unay ti panangipadto ni Isaias a mammadto ti panagsaknap dagiti intereses ti Pagarian iti kaaldawantayo idi a kinunana: “Ti idadakkel ti panangituray ti gobierno [ni Kristo] ken ti kappia awanto ti inggana.” (Isaias 9:7, King James Version) Dagiti report manipud nasurok a 200 a pagilian a pangaskasabaan dagiti Saksi ni Jehova ti naimbag a damag ipakpakitana ti bendision ni Jehova iti trabaho a maar-aramidan. Adtoy ti sumagmamano a panangiyebkas manipud nadumaduma a paset ti daga.
◻ Africa: Kuna ti sanga ti Senegal a “daytoy a tawen serbisio nakitana a naminsan manen ti nabaknang a bendision ni Jehova.” Idiay puro ti Mauritius, a sadiay nangrugi ti trabaho idi 1951, ti bilang dagiti Saksi ti dimmanonen iti 100 idi 1964 ket 679 idi 1984. Inreport ti Ghana a dagiti Saksi iti dayta a pagilian ti rimmang-ay manipud 30 idi 1938 ingganat’ 25,755 itatta! Ti ministerio ti panagpayunir ti rumangrang-ay met idiay Africa. Maysa a payunir idiay Sierra Leone ti nangted iti rason no apay nga isut’ adda iti amin-tiempo a trabaho: “Pinilik ti panagpayunir agsipud ta ti ipapan iti kolehio wenno unibersidad ket panagsaysayang laeng iti napateg a tiempo a mausar a pangtulong kadagiti nasingpet-panagpuspusona a tattao a makagun-od ti umiso a pannakaammo maipapan ken Jehova ken ti Anakna, ni Jesu-Kristo, sakbay nga umay ti panungpalan.” Dagiti nabiit pay a kumbension a naangay idiay Sud Africa, imparangarangna ti panagkaykaysa. Ti sanga ti Watch Tower sadiay kunana: “Daytoy a tawen naaddaankam ti damdamona a naan-anay a panaglalaok ti rasa a kumbension iti daytoy a pagilian . . . Ti nadumaduma a rasa a bautismo ti 343 ti maysa a naisalsalumina a pangarigan ti panagkaykaysa dagiti karnero ni Jehova iti daytoy nagadu ti rasana a pagilian.” Idiay Zimbabwe maysa a lokal a politiko inawatna ti kinapudno ket inyawatnan ti panagikkatna iti partido. “Daytoy ti nangpataud ti dakkel a riribuk ket ti banag naipan iti maysa a bumisbisita nga opisial iti maysa a miting publiko. Idi napagsaludsodan no aniat’ aramiden iti daytoy a kabsat kuna ti opisial, ‘Awan ti aramidenyo. Dayta ti pagannurotanda uray sadino iti lubong. No agtultuloy kas maysa a miembro ti partido isut’ saan a pudpudno a Saksi ni Jehova.’”
◻ Asia ken ti Pacifico: Ti espiritu ti amin-tiempo a serbisio a panagpayunir ti nakaskasdaaw idiay Japan a 40 porsiento kadagiti amin nga agibumbunannag iti adda iti amin-tiempo a serbisio bayat ti Mayo. Ti sanga ti Filipinas kunana a daytat’ nakaipasalista ti aganay 200 a baro a payunir ti kada bulan. Kuna met ti Australia a “ti espiritu ti panagpayunir ti pudno a naisangsangayan iti daytoy a tawen.” Ti India ti addaan kadagiti baro a pasilidades ti sanga ken ti baro a kangatuan a bilang a 6,506 nga agibumbunannag. Nangangayda ti 14 a kumbension nga adda 7 pay a naangay iti damdamona unay kadagiti lokal a pagsasao. Nasurok a 9,000 ti timmabuno, ken 246 ti nabautisaran. Maragsakankami a makakita iti irarang-ay iti daytoy naglawaan a pagilian. Ti panagsaknap ti makitkita met idiay Korea. Ti baro a sangada ti naidedikar idi 1982 ngem ita nagbalin a bassit unayen. Agibangbangonda manen tapno madoble iti espasioda. Dagiti regular payunir ti rimmang-ay iti 56 porsiento iti dayta a pagilian. Ti Makinlaud a Samoa maysa a kabarbaro a nabuangay a sanga a mangaywan a nasaysayaat kadagiti kasapulan dagiti taga Samoa. Gapuna ti “tay-ak” ni Jehova idiay Asia ken ti Pacifico maan-anidan.
◻ Europa: Ti irarang-ay ti Pagarian ti makitkita met idiay Europa. Nagsurat ti Portugal: “Adda ‘panagbettak’ ti interes iti isuamin a lugar. Di pay agbayag kalpasan a madanon ti maysa a kangatuan a bilang a daytat’ malab-awanto manen iti sumaruno a bulan.” Inyallingag ti Belgium daytoy met laeng a rikna, a kunkunana: “Sadinoman ti panagsaknap ti maar-aramid.” Idiay Selters, Alemania, indedikarda ti maikadua a kadakkelan a pasdek ti sanga iti intero a lubong, nga amin malaksid ti maysa kadagiti miembro ti Bagi a Manarawidwid dagiti Saksi ni Jehova nakipasetda. Maysa a kabsat ti natignay a nagsurat: “Nalabit a mailadawanyon no kasanot’ riknami kalpasan ti 60 años a panagserbi—20 años iti dayta ti binusbosmi idiay pagbaludan gapu ti dua a nagsaruno nga allon ti pannakaidadanes—tapno mabalinanmi ti makipaset iti daytoy nakaskasdaaw a naespirituan a rambak wenno bankete ti naespirituan a paraiso?”
◻ Americas: Ti Canada naaddaan met ti naisangsangayan a tawen ti panagrang-ay nga adda 80,939 a nagreport ti serbisio. Ti sanga sadiay ti nagkomento: “Makaparegta unay a numan pay dagiti dumakdakkel a rigat ken panangal-allukoy ti marmarpuogen a lubong, nakapagtultuloykami a dimmakkel iti nakaskasdaaw unay. Umasping daytoy iti naisangsangayan a panagsaknap ti immuna a Kinakristiano bayat dagiti nariribuk a maudi nga al-aldaw ti lubong a Romano. (2 Timoteo 3:1-5)” Ti Belize, Central America, kunana a maysa kadagiti tampok iti tawen ket isu ti “panagdaliasat a nangsarungkar kadagiti purpurok dagiti Mayan Indian idiay abagatan ti pagilian. Tapno madanon dagitoy naiputputong a purok (a 12 ti bilangda) masapul a magna ti maysa ti 113 milias (180 km) kadagiti kabakbakiran.” Sangapulo ket dua a kakabsat ti nangaramid iti daytoy a panagdaliasat a siaawitda kadagiti pasiking ken dagiti bales, ti maysa nga innem-boltahe nga “slide projector,” ken kadagiti bateria ti motorsiklo. Nagipabuyada ti slides maipapan iti sangalubongan a trabaho ti Pagarian ni Jehova. Maysa a tao a di pay nakakitkita idi ti panagipabuya ti slide dineskribirna dayta kas “dakkel a retrato iti pader nga addaan nalawag a silawna.” Ti Mexico ti dimmakkel manipud 81 nga agibumbunannag idi 1931 inggana iti kangatuan a bilang a 151,807 idi 1984 (maysa a 16-porsiento nga irarang-ay iti tawen), ken 695,769 ti timmabuno ti Memorial idi napan nga Abril. Ti Estados Unidos ti addaan met ti engrande a baro a kangatuan a bilang a 690,830 nga agibumbunannag.
Ti irarang-ay ti Pagarian ti agtultuloy iti sangalubongan.