Maysa a Sentenario a Laglagipen
NAPRIBILEHIUAN ti ili ti Dios a makapaliiw kadagiti adu a moderno-aldaw a milagro. Naisangsangayan kadagitoy isu ti panagdakkel ti sangalubongan nga organisasion nga us-usaren ita ni Jehova a mangiwaragawag ti naganna iti intero a daga. Daytat’ nangrugi amin idiay Pittsburgh bayat ti karrugi ti 1870’s babaen iti bassit a grupo dagiti napasnek nga estudiante ti Biblia. Dagitoy ti sipapardas nga immadu, a gapu itoy nesesita ti panangbuangay ti maysa a legal a korporasion a mangaywan iti agsaksaknap nga organisasion. Gapuna, nainkorporar ti Zion’s Watch Tower Tract Society idi Disiembre 13, 1884, iti sidong dagiti linlinteg ti Commonwealth of Pennsylvania.
Iti nabiit pay, iti Sabado, Oktubre 6, 1984, ti maika-100 a tinawen a miting dagiti miembro ti korporasion—a pagaammo itan kas ti Watch Tower Bible and Tract Society of Pennsylvania—ti naangay idiay Pittsburgh. Maysa nga espesial nga okasion a talaga! No kasano a dagiti napapateg a pasamak idi ugma ti malaglagipda, maiyanatup met a dagiti Saksi ni Jehova markaanda daytoy a sentenario ti Watch Tower Society babaen iti maysa a naisangsangayan a panagtataripnong. Gapuna makaipaaydat’ panagyaman ken dayaw ken Soberano nga Apo Jehova, a nangsalaknib ken nangpastor iti daytoy agsaksaknap nga organisasion a makalasat kadagiti nariribuk a tawtawen ti napalabas a siglo.—Josue 4:4-8, 20-24; Ester 9:20-22; Salmo 23:1-6.
Miting ti Korporasion
Dagdagus iti alas dies ti agsapa ti Oktubre 6, ti tinawen a miting ti korporasion ti Sosiedad ti naluktan idiay Coraopolis Assembly Hall of Jehovah’s Witnesses, Pittsburgh. Kadagiti nailubongan nga organisasion, ti miting dagiti korporasion ti masansan nakamagmaga, a dagita iti bambanag maipapan laeng ti negosio. Ngem daytoy a miting ket naisalsalumina.
Kadagiti 429 a miembro ti korporasion, 259 ti presente, agraman dagiti sangailida—a daytat’ nagdagup ti 1,615 a tattao. Dagitoy ti nagdaliasat nga immay iti miting manipud 53 a nagduduma a pagilian—manipud kadagiti adayo a luglugar kas ti Alaska, Antigua, Argentina, Australia, Austria ken agingga iti maudi a letra ti alpabeto a Zimbabwe. Ti pormal nga eleksion dagiti uppat a direktor ti Sosiedad ti sinaruno iti makapabileg iti naespirituan a programa dagiti palpalawag. Maysa kadagitoy, naibatay iti tinawen a teksto a pinili dagiti Saksi ni Jehova nga agpaay iti 1985, 2 Timoteo 4:5, a mangbagbaga iti tunggal maysa: “Tungpalem a naan-anay ti ministeriom.”
Daytat’ sinaruno iti maysa a makatignay a palawag ti 91-años ti tawennan a presidente ti Sosiedad, ni F. W. Franz. Kunana a di pay pulos naragsakan ngem ita, agarup 65 años ti napalabasen, a kaduana idi ni J. F. Rutherford, a damona a nangngegan ti sasao nga “organisasion ti Dios.” Kalpasan iti panangtontonna ti irarang-ay ti organisasion ditoy daga, inyebkasna ti panagyaman a daytoy maika-100 tawen ti organisasion ni Jehova inusarna ti nainkorporar a Sosiedad a mangiyeg kadatayo kadagitoy makaited-biag a Nainkasuratan nga impormasion. Dimmanon ti timek ni Kabsat Franz iti naballigi a kinangato idi inadawna ti maudi a bersikulo dagiti Salmo, a kunkuna, ‘Amin nga adda angesna—idaydayawda koma ni Jah—HALLELUJAH!’
‘Ni Jehova Adda iti Ilina’
Ti naisalsalumina a nainkabsatan nga ayat ken kinamanagpadagus ti imparangarang dagiti kongregasion dagiti Saksi ni Jehova idiay Pittsburgh. (Hebreo 13:1, 2) Ti managsakripisio nga atension ti naipaay tapno makaisaganada kadagiti nasayaat a taraon, pagdagusan ken transportasion, ket tunggal organisasional a detalye ti inaywananda iti panangisagana iti agdindinamag a Three Rivers Stadium ti Pittsburgh a maipaay iti tallo-oras a miting iti rabii nga isut’ simmaruno
Arigna ti maysa nga isem ti iyaanamong manipud ken Jehova a ti kasasaad ti panawen iti daytoy aldaw ti otoño ket nakasaysayaatda. Gapuna, ti dagup a 37,733 nga adda iti stadium nagimdengda a sikukomportable ken buyogen ti panangipateg. Dagiti telepono ti nangipan met ti programa kadagiti 34 nga Assembly Halls of Jehovah’s Witnesses idiay Estados Unidos ken Canada, a sadiay adda pay 59,715 a nagdengngeg—a nangaramid ti naindaklan a dagupna a 97,448 a timmabuno. Amin dagitoy ti naikkan kopia iti naranga a 32-panid nga estilo broshur a programa kas pakalaglagipan iti naragsak a pasamak.
Ti sesion ti rabii ti nangrugi babaen ti naragsak a kanta ken panagkararag. Kalpasanna dagiti sangapulo a miembro ti Bagi a Manarawidwid dagiti Saksi ni Jehova inranudda kadagiti adu kadagiti dadduma a nabayagen nga ad-adipen ni Jehova ti tema a: “Pinaneknekan ni Jehova nga Isut’ Adda a Kadua ti Ilina.” Kas kunaen ti broshur a programa: “Pudno nga, adda dakkel nga ebidensia a pinaneknekan ni Jehova a kaduana ti ilina ket binendisionanna ken impasdekna ti trabaho kadagiti im-imada—a naaramidan dayta babaen ti tulong ti Watch Tower Society. Gapuna, maitunos kadagiti pampanunot ti Salmo 78:2-7, maiyanatup laeng nga usarentay daytoy nga okasion a mangisalaysay ken mangipadamag kadagiti kabbaro a kaputotan ‘dagiti daydayaw ni Jehova . . . ken dagiti nakaskasdaaw a naaramidanna.’”
Dayta la nga agpayso ti inaramid ti programa! Ni Hitler ken dagiti apostata a relihionista pinadpadasda nga ikisap dagiti Saksi ni Jehova “kas peste,” ngem dagita a bumusbusor ti nagawandan, a masansan, “kas niebe iti baba ti init.” Ti manangipatarus ti Biblia a ni Goodspeed inladawanna dagiti umuna-siglo a Kristiano kas maysa a “manangipatarus ken manangipablaak a tattao.” Ket anian a pudno daytoy met kadagiti maika-20 siglo a Saksi! Bayat ti 105 tawen a nagpatingga iti 1984, dagitoy a Kristiano nakaipablaakdan, kadagiti 200 ken nasursurok pay a pagsasao, ti 8.8 bilion a Biblia, libro, polieto, magasin ken tracts. Ti New World Translation ti intero a Biblia wenno ti paset ti Griego a Kasuratan laeng, ti naimaldit iti 14 a pagsasao iti dagupna a 51,034,000 kopia. Ti din agbayag maysa a pambulsa nga edision daytoy a Biblia ken kasta met ti dakkel-letrana iti uppat a tomo ti magun-odanto metten. Gapuna, agtultuloy ti Watch Tower Society a pangulo iti panagipablaak ti Biblia.
Kuna ti broshur: “Maysa a pammaneknek ti kalibre dagiti matalek a lallaki a nakapagserbin iti Watch Tower Society ti makita iti kinapudno a bayat ti las-ud ti 100-tawen uppat laeng a nagduduma a lallaki ti nagserbi iti responsable a saad ti kinapresidente ti Sosiedad.” Agtigtignay a sisasayaat ti organisasion ni Jehova nga agturong iti maudi a panagballigi. Kas inkumento ni Martin Poetzinger, a nangsalimetmet ti kinatarnawna ti las-ud ti siam a tawen iti Nazi a kampo konsentrasion: “Agtalinaedkayo ken Jehova ken ni Kristo ken iti organisasion ti Dios, ket makitayo ti naballigi a panagbiktoriana kadagiti isuamin a kabkabusorna.”
Ti maudi a nagpalawag iti rabii, ni presidente F. W. Franz, inladawanna daytoy nga aldaw a sentenario kas “maysa nga okasion a dinto pulos mauliten.” Anian nga agpayso! Iti panangrepaso iti nakaragragsak a historia ti Sosiedad, nalagip ni Kabsat Franz dagiti sasao ni J. F. Rutherford, ti maikadua a presidente, a natay idi 1942. Di nabayag sakbay ti ipapatayna, kunana, “Bueno, Fred, kasla ti dakkel a [bunggoy] ket saan met laeng a dakkel gayam.” Inkomento ni Kabsat Franz, “Nabiit unay ti ipapatayna.” Iti dayta a tiempo dagiti Saksi ni Jehova agbilangda laeng ti 100,000 iti intero a lubong. Itatta, literal a ‘minilmilion kadagitoy a saanen a matay’ ti nainayon iti ranggo dagitoy matalek nga ad-adipen.
Agpatingga ni Kabsat Franz kadagitoy a sasao: “Matignaytayo a mangikuna a sangsangkagiddan: ‘Dayaw ken Jehova a Dios ti Sapasap a Soberano.’” Babaen iti gumurruod a panagpalakpak amin dagiti presente inyebkasda ti naimpusoan nga iyaanamongda. Kalpasan ti maudi a kanta ken panagkararag pimmanawdan nga agturong kadagiti pagilianda ken kongregasionda a buyogen ti narag-o a determinasion nga agtultuloy iti trabaho ni Jehova aginggana a daytat’ malpas.