Report dagiti Manangiwaragawag ti Pagarian
Nagunggonaan ti Panagsapsapul iti Kinapudno
KUNAEN ti Biblia kadatayo a “sapulenyo ni Jehova, . . . umawagkayo kenkuana.” (Isaias 55:6) Ni Salomon pinakaammuan ni Jehova: “No isu [ni Jehova] ti sapulem, isu masarakmonto.” (1 Cronicas 28:9) Maysa nga agtutubo a babai idiay Finland ti nagsapsapul ti kinapudno maipapan ken Jehova ket isut’ sibabaknang a nagunggonaan.
Isu ti naikameng iti Iglesia Estado iti Finland ket nagadal idiay Confirmation School, a mangin-inanama a masarakannanto ti kinapudno maipapan iti Dios. Isut’ napaay, nupay kasta. Saanda unay a basbasaen ti Biblia idiay eskuelaan. Kinapudnona, ti padi ti nangpakdaar kenkuana a dina basbasaen dayta, ta daytat’ mangriribuk ti kinatimbeng ti pampanunotna.
Nupay kasta, rinugianna a binasa ti Biblia kalpasan ti panagturposna iti eskuelaan. Isut’ napnapan met idiay simbaan, ngem awan masarakanna a pannakapnek sadiay. Kalpasanna napan iti Iglesia Pentecostal a sadiay “simrek iti pammati.” Isuda ti nagkararag a maipaay kenkuana ket kinunada kenkuana a nagun-odanna itan ti pammati. Ngem saanna a narikna nga isut’ nasingsinged iti Dios ngem iti napalabas a panagrikriknana.
Isut’ nagsurat iti “Gang and Street Service Center” a maipaay ti tulong, ngem isut’ inikkanda laeng ti maysa a numero ti telepono. Idi isu ti immawag, ti telepono ti sinungbatan ti maysa a Metodista a nangikararag kenkuana ken nangibaga kenkuana nga uray no ania a simbaan ti papananna la ket di no saan a makitiptipon kadagiti Saksi ni Jehova wenno kadagiti Mormons!
Isut’ timmabuno iti People’s Mission ket naikkan kadagiti polieto nga iwaras a napauluan Jehovah’s Witnesses, the Deception of the Time of the End. Daytoy ti di nangpennek ti panagsapsapulna iti kinapudno wenno nangted panggep iti panagbiagna.
Kalpasanna sinarungkaranna ti ikitna a nangkellaat kenkuana idi a kinunana a patienna a dagiti Saksi ni Jehova ti mangisursuro ti kinapudno. Sikakalma a nangbasa ti ikitna kadagiti kasuratan manipud iti Biblia a nangpaneknek a panggep ti Dios a pagbalinen a paraiso daytoy daga, ket inikkanna ti libro a Ti Kinapudno a Mangiturong iti Biag nga Awan Inggana. Ti balasang ti nangbasa iti libro nga addaan panggep nga agsapul kadagiti biddut iti dayta—tapno paneknekanna a di umiso dayta—ngem imbes a kasta di nagbayag nailasinna a daytat’ naglaon iti kinapudno, a nangipakpakita kenkuana ti panggep iti biag nga isut’ nabayagen a sapsapulenna. Isut’ nagsurat kadagiti manangipablaak a maipaay kadagiti dadduma pay a libro ket indawatna nga adda koma sumarungkar kenkuana. Dua laeng nga aldaw kalpasanna, dua a payunir a kakabsat a babbai ti dimteng idiay ruanganda. Maysa a panagadal ti Biblia ti naiyurnos ket ti balasang nangrugin a tumabuno ti panaggigimong idiay Kingdom Hall, nga isut’ masdaawan unay ken natignay gapu iti naayat nga atmospera nga adda sadiay. Intultuloyna ti panagad-adalna ti Biblia, nabautisaran kalpasan ti makatawen, nangrugi nga agpayunir, ket timmabuno iti Pioneer Service School. “Iti kamaudianan maragsakanak met laengen,” kunana. Ti panagsapsapulna ti kinapudno ti nagunggonaan.
Dagiti umas-asping a kapadasan ti maulit-ulit rinibribon a daras bayat ‘ti panungpalan daytoy a sistema dagiti bambanag,’ bayat a ni Jesus, ti Naimbag a Pastor, ur-urnongenna dagiti “sabsabali a karnerona” kas naipadto idiay Juan 10:16. (Mateo 24:3) Ngarud maragsakan, dagidiay agsapsapul iti kinapudno ti Biblia ken dagidiay gunggonaan ti Dios.—Mateo 7:7.