Determinado nga Agbiag Babaen kadagiti Moral a Pagalagadan ni Jehova
NALAWAG ti panangipakita ti Biblia a no ti maysa a lalaki ken babai agtiponda nga awan ti legal a panagasawa, agar-aramidda iti pannakiabig, ket iti kasta a kasasaad, didanto tawiden ti Pagarian ti Dios. (1 Corinto 6:9, 10) Maysa a kapadasan manipud British West Indies ti nangisalaysay ti maipapan iti agtutubo a babai a nakaammo iti daytoy a kinapudno.
Idiay St. Lucia, dua kadagiti Saksi ni Jehova ti nakasarak ti maysa a babai, a nangipakita iti interes iti Biblia. Kas resultana, narugian ti panagadal ti Biblia kenkuana. Bayat a rumangrang-ay ti pannakaawatna, nakitana ti pannakasapul a mangaramid iti moral a panagbalbaliw. Nupay isut’ ina ti uppat nga ubbing, isut’ saan pay a kasado no di ket agbibiag a kas kerida laeng ti maysa a lalaki. Isu ken ti lalaki nagreggetanda ti makaibangon ti maysa a bassit a balay a pagtataenganda amin nga innem.
Idi mabigbigna a ti biagna ket di maitunos kadagiti nalinteg a pagalagadan ti Dios, determinado daytoy nga agtutubo a babai a mangaramid iti panagbalbaliw. Mabalinna a pakasaran ti lalaki a kabkabbalayenna wenno isu ti sumina kenkuana. Nakisaritaanna dayta a banag iti lalaki, ngem awan tarigagay ti lalaki nga agkasarda. Isut’ kontenton iti kasasaadna nga agkabkabbalayda laeng. Ania ngay ti nangtignay ti pammatina nga aramidenna? Isut’ masapul nga agdesision no kayatna a paragsaken ni Jehova, ket kalpasan ti panangusigna a buyogen ti panagkararag, naikeddengnan ti sumina iti lalaki. Ngem sadino ngay ti pagtaenganna a kadua ti uppat nga annakna?
Kalpasan a nakisaritaanna dayta iti lalaki, nagtenganda ti nainkalintegan nga urnos—kagudua ti balay ti kukua ti tunggal maysa! Babaen ti naayat a tulong dagiti kakabsat, agraman ti lalaki a panawanna, nagudua ti balay, ti kagudua agpaay kenkuana ket ti sabali a kagudua agpaay iti lalaki. Ti kagudua ti balay ti naiyakar met laeng iti dayta nga aldaw iti sabali a lugar nga agarup lima a milias (8 km) ti kaadayona. Iti uneg ti maysa a lawas, dayta ti naibangon manen ket napagbalin a maysa a bassit a dua ti siledna a pagtaengan.
Iti panangalana iti addang a mangiyeg iti biagna a maitunos kadagiti pagalagadan ni Jehova, dagdagus a nakipaseten iti tay-ak ti serbisio, a kinuyog dagiti uppat nga annakna. Indedikarnan ti biagna ken Jehova ket di nagbayag isut’ nabautisaran. Tapno marambakan dayta nga okasion isut’ nagpasalista kas auxiliary payunir. Isu itan ti ad-adda pay a nabendisionan iti baro a pagtaenganna ta daytat’ maus-usaren kas lugar iti Panagadal iti Libro ti Kongregasion nga addaan iti promedio a tumabtabuno a 17. Pudno unay, binendisionan ni Jehova ti determinasionna nga agbalin a nadalus a managdaydayaw kenkuana.