Ania a Karera ti Pilienyo?

MAYSAKAY kadi nga agtutubo ken ages-eskuela pay? No kasta, awan duadua a nabendisionankayo kadagiti sansanikua nga iyeg ti kinaagtutubo​—nasayaat a salun-at ken aglaplapusanan a kinapigsa. Adda a naiyunnat ti biagyo iti sanguananyo kas maysa a kalsada a di pay napagpagnaan. Kasano ti panangusaryo iti dayta kadagiti umay a tawtawen?

Bayat ti panangpampanunotyo maipapan iti masanguananyo, awan duadua nga aggarasugas dagiti salsaludsod iti isipyo. Rebbeng kadi a mapanak iti unibersidad, ket mangala iti karera kas maysa a doktor, maysa nga abogado, wenno maysa a sientista? Ti kadi panagar-arapaap nga umuli iti agdan ti maysa a korporasion nga agturong iti pinansial a panagballigi ken pannakabigbig ti makaallukoy kaniak? Agbalinto aya a nalatak ti naganko iti arte babaen iti panagartista wenno ti panagpinta? Wenno, kas maysa nga agtutubo a napeklan ken Jehova a Dios, rebbeng kadi a piliek ti amin-tiempo a ministerio kas ti kapaut-biag a karerak, iti kasta ‘laglagipek ti Namarsuak kadagiti aldaw ti kinaagtutubok’?​—Eclesiastes 12:1.

Masansan ipimpinta dagiti pagiwarnak ken dagiti artikulo ti magasin ti biag dagiti nalatak a tattao kas makaparagsak ken naranga, ngem aniat’ ammoyo maipapan iti biag ti maysa nga amin-tiempo a ministro? Dayta kadi ti naliday wenno makauma? Wenno dayta ketdi ti pudno a makapainteres ken nakaragragsak? Ti panangusig iti sumagmamano kadagiti pudpudno a kapadasan dagidiay nga addan iti amin-tiempo a ministerio iti adun a tawtawen ti makatulong kadakayo a mamagbalbaliw iti panunotyo.

Apay a Pinilida ti Amin-Tiempo a Ministerio

Bayat nga kaing-ingetan ti gubat idiay Vietnam, ages-eskuela idi ni Harry idiay University of Hawaii, nga agad-adal iti panagbalinna a mannursuronto iti historia. Isu met ti makipagad-adal iti Biblia kadagiti Saksi ni Jehova. Kas kadagiti adu a kaklasena, isut’ nairaman iti radikalismo dagiti estudiante a nalatak iti dayta a tiempo, rinugianna ti nageksperimento iti droga, ket nasarakanna a makakayaw unay ti LSD. Maysa nga agsapa isut’ nariing idiay apartmentna tapno maipasango laeng iti napalalo a pannakaiwarawara dagiti nabubuong a bote ti arak, dagiti rungrong ti sigarilio, ken dagiti agkaraiwaris a lallaki ken babbai idiay datar. Ni Harry ti addaan laeng iti nalibeg a pannakalagip iti maysa a pannakisuppiat iti polisia maipapan iti search warrant ken ti simmaruno a pammutbuteng iti panamagtalaw ti pagab-abanganna kenkuana iti ab-abanganna a balay. Iti daytoy a punto nga inkeddengna no sardengannan ti agadal iti Biblia wenno dalusanna ti panagbiagna. Sisisirib, pinilina ti panangdalus iti biagna.

Bayat a naparang-ay ni Harry ti pannakaammona iti Biblia, napukawen ti reggetna iti kalat a panangitultuloy iti panagbasbasana iti unibersidad ken ti karera a panangisuro. Pimmanaw iti kolehio, nangala iti paset-tiempo a trabaho, nabautisaran, ket di nagbayag kualipikadon nga agbalin a payunir​—maysa nga amin-tiempo a manangaskasaba. Iti kasta rinugian ni Harry ti baro a karerana, a maysa a napunno kadagiti karit ken makaay-ayo, makapainteres a kapkapadasan.

Manipud iti ranggo dagiti espesial a payunir, natudingan ni Harry ken ti asawana nga agbalin a misionero idiay nagpintas nga “isla ti bato” iti Belau idiay Western Pacific, a sadiay pay laeng ti pagserserbianna. Aniat’ langa ti panagbiag kas misionero kadagitoy nga isla?

Panangaskasaba Babaen iti Barangay

Kaaduan a panangaskasaba kadagiti purpuro ti Micronesia ket maar-aramid babaen iti barangay ken iti pannagna. Ni Harry ken ti asawana, ni Rene, malaglagipda pay ti damo a panangaskasabada babaen iti bilog kadagidiay makinruar a purpuro. “Nakipagnaedkami iti maysa a balay nga adu a milia ti kaadayona idiay agsikkosikko a karayan a lumasat kadagiti kaykayo a mangrove ken nakapuspuskol kabakiran a dagitoy ti nangted iti nalagalaga a linong dagiti berde a bulbulong iti ngatuen dagiti ul-ulomi,” malaglagipna. “Manipud iti pagtataenganmi, agdaliasatkami babaen iti karayan, nga agsardesardeng a mangasaba kadagiti tattao nga agnanaed kadagiti ig-igid ti karayan. Maysa a malem, sakbay ti panagsipngetna, agaw-awidkamin manipud tay-ak ti serbisio ket nagganatkami a napan idiay karayan tapno makaawidkamin idiay pagtataenganmi iti dayta a rabii. Pagammuan ta nagikkis ni Rene. Timmaliawak a dagus ket nakitak ti maysa a panagtappuak idiay danum ken ti nagatiddog nga ipus ti maysa a buaya a naguyas a nagturong iti danum. Daytat’ maysa a buaya iti apgad​—ti kadadakkelan a kita iti lubong. Pagyamanan laengen ta nakagtengkami idiay balaymi a natalged ken nasalun-at. Nupay tiempon nga agdigos koma idiay karayan, kalpasan ti pannakakitami iti nagdakkel a buaya, napanunotmi a nataltalged ti panangsingdan ti tali iti maysa a timba ket sinakdomin ti danum a pinagdigosmi idiay barangaymi.”

Yantangay adu kadagiti purpurok ken balbalay ti saan a madanon babaen kadagiti lugan a magna iti daga wenno babaen iti barangay, dagiti misionero ti mangbusbusbos iti adu nga oras a magmagna kadagiti sirsirok dagiti napipintas a kaniogan nga isu ti nanglinea kadagiti desdes ti kabakiran tapno madanon dagiti naingayyeman, napakumbaba a tattao. Kuna ni Harry: “Kanayon a makasarakkami kadagiti lapayag a dumngeg iti kinapudno. Dagitoy naiputputong a tattao ti masansan a managpadagosda. Umulida ti maysa a niog ket mangpurosda iti maysa a naganus a bungana, tikapanda ti tuktokna babaen iti buneng, ket sadanto itukon ti iyiinumyo manipud iti mismo a ‘sabotna.’ Dayta ti makabang-ar unay, nagnanam, ken makapasalun-at.”

Kasano ti pannakagunggona ti panagregget dagiti misionero idiay Belau iti panangaskasabada? Adda itan ti maysa a kongregasion a buklen ti 42 a pudno a Kristiano. Iti promediona, 10 ti adda iti amin-tiempo a ministerio iti kada bulan idi napan a tawen, ket 193 ti timmabuno iti Memorial iti ipapatay ni Kristo idi 1985.

Kalpasan ti 17 a tawen iti amin-tiempo a serbisio, kasanot’ panagrikna ni Harry iti pangngeddengna a mangusar a naan-anay iti biagna iti serbisio ken ni Jehova? “No diak pay koma nasarakan ti kinapudno iti Dios 17 a tawenen ti napalabas, ti tiempok ken biagko ti nasayang koma kadagiti nailubongan a bambanag,” kinunana. “Diak koma pulos nasarsarakan ti talna iti isip ken ti talged a pagaammokon bayat iti adu a tawtawen ti panagpayunirko ken kinamisionerok agpadpada kas maysa nga agwaywayas iti adu a tawtawen ken kamaudiananna kadua ni Rene nga isut’ kakkakuyogko iti napalabasen a walo a tawtawen iti serbisio a kinamisionero.”

Panangirekomendar iti Amin-Tiempo a Serbisio

Ni Milton ti nagatender iti high school idiay Hawaii. Dadduma ti mangparparegta kenkuana a manggun-od iti karera a mangikarkari iti pinansial a kinatalged, ngem ti ulidan ti kabsatna a babai ken dua kadagiti manongenna nga addan iti amin-tiempo a serbisio kas payunir, ti nangparegta kenkuana a nakapanunot a sumrek met iti amin-tiempo a ministerio. Mainayon pay isut’ nakangngeg iti maysa a palawag maipapan kadagiti bendision iti amin-tiempo a serbisio ken no kasano ti panangipaay ni Jehova kadagiti material a kasapulan no agtalektayo kenkuana ket isut’ ipangpangrunatayo iti panagbiagtayo. Insalaysay ni Milton: “Daytoy ti nangtignay kaniak a nangpili iti amin-tiempo a ministerio kas karerak iti biag. Gapuna, sakbay ti panagturposko iti high school, nabautisaranak ket simrekakon iti amin-tiempo a serbisio.”

Idi mangrugi nga agpayunir ni Milton, adda laeng kurang pay ngem sangapulo a payunir idiay kongregasion. Ania ti inaramidna maipapan iti dayta? “Inawisko dagiti agtutubo a kakabsat a lallaki a makipagtrabaho kaniak iti tay-ak ti serbisio,” kinunana. “Kas resultana adu kadagitoy ti kimmuyog met laeng kaniak iti kamaudianan iti amin-tiempo a serbisio.”

“Ti bayawko ket maysa kadagiti panglakayen ken maysa met a payunir,” intuloy ni Milton. “Maymaysa a kongregasion ti ayanmi ken nagtimpuyoganmi a paregtaen dagiti dadduma nga agpayunir. Naikeddeng a paregtaek dagiti tin-edyers, ket isu met ti mangparegta kadagiti assawa a babbai. Kalpasan ti sumagmamano a bulan, addan ti 25 nga amin-tiempo a ministro iti kongregasion. Idi simmarungkar ti manangaywan iti sirkito, inawisna ti sangapulo kadagitoy nga agaplikar kas espesial payunir ket immakarda kadagiti kaarruba a kongregasion. Kalpasanna nagsaritaanmi ti kalat a panangtulong ti sangapulo pay a sumrek iti serbisio a kinapayunir tapno masukatan dagidiay naibaon iti dadduma a lugar. Iti sumaganad nga isasarungkar ti manangaywan ti sirkito, 15 pay ti simrek iti amin-tiempo a serbisio. Itan addaankamin iti 30 a payunir. Indawat manen ti manangaywan ti sirkito nga umakar ti sangapulo kadagiti dadduma a kongregasion. Ket rinugianmi manen ti agala kadagiti kasukatda. Sakbay ti sumaganad nga ibibisita ti manangaywan ti sirkito, 20 pay ti nagaplikar iti payunir a serbisio!”

Ti espiritu ti panagpayunir ti pudno a makaalis kadagiti agtutubo. Inton magtenganda ti high school, ngangngani aminda ti nakasaganan iti amin-tiempo a serbisio kas kalatda. Idi agtawen iti 13, maysa a kabsat a babai, ti nangikeddeng nga agpayunir. Kinunana: “Kasla isut’ natural a banag nga aramiden.” Isu ken dagiti dadduma nga agtutubo idiay kongregasion ti pulos saan pay a nangipaay iti maikadua a panangpanunot iti sabali a banag. Naiyurnos dagiti panangaskasaba iti grupo kalpasan ti panageskuelada, ket idi agangay 60 nga estudiante manipud tallo a nagduduma nga eskuelaan ti mangsupsuportaren iti daytoy a trabaho a kadua dagiti payunir. Bayat dagiti bulan ti kalgaw. makaparegta unay a makita ti aginggat’ 130 nga agtataripnong a maipaay iti grupo a panangaskasaba!

Panagpayunir ti Mangiturong kadagiti Daddadakkel a Pribilehio

“Idi 1974,” malaglagip pay ni Milton, “naawisak nga umawat iti trabaho kas misionero iti maysa a destino a 4,000 milias [6,400 km] manipud pagtaengak​—idiay purpuro ti Belau sadi Micronesia.” Maysa a karit a medio nabayag a nakairuamak isu ti pampannagna kadagiti adayo a distansia a lumasat kadagiti tropikal a kabakiran ken agdaliasat babaen kadagiti barangay.

Maysa a nagpudot, nasalimuot nga aldaw kalpasan ti pannagna iti adu nga oras kadagiti nakataptapuk a desdes, malaglagip pay ni Milton “nabannogkami unay idi makagtengkamin iti pagtaengan ti maysa nga interesado a pamilia. Imbaon ti ina ti anakna a lalaki a mapan idiay karayan. Nagawid a sangkaawitna ti maysa a nagdakkelan, napalamiis idiay karayan a sandia a para kadakami. Kinnanmi ti nasursurok ngem kagudua, ket anian a makabang-ar unay dayta!”

Kalpasan ti maysa a tawen idiay destinona kas misionero, tinarigagayan ni Milton a makita ti pannakaibanag ti tallo a kalat idiay Belau, nga isu ti, dagiti lokal a kakabsat a lallaki isudanton ti mangaywan kadagiti rebbengen ti kongregasion, dagiti agtutubo sumrekda iti amin-tiempo a serbisio, ken ti kongregasion ibangondan ti kabukbukodanda a Kingdom Hall. Itan agkomenton: “Kalpasan ti sangapulo a tawen ditoy, nasungbatan dagiti karkararagko a pannakaragpat amin kadagiti tallo a kalat.”

Patien kadi ni Milton a naaramidanna ti umiso a panagpili 14 a tawen ti napalabasen idi simrek iti amin-tiempo a serbisio kas karera iti panagbiagna? “Maysa a banag a naadalko manipud amin a tawtawenko iti amin-tiempo a serbisio isu daytoy: No situtuloktayo, usarennatayo ni Jehova iti umiso a tiempo,” insungbatna. “Ditay koma sumuksuko no di ket agtultuloytayo a mangitukon iti bagitayo a situtulok iti serbisiona. Dikayto pagbabbabawyan ti karera a panagserbi ken ni Jehova kas amin-tiempo a ministro.”

Kasanot’ Panangusaryo iti Biagyo”

Dakayo nga agtutubo, kasanot’ panangusaryo iti masanguananyo? Agpaay a kabukbukodanyo wenno naan-anay nga agpaay ken ni Jehova? (Roma 14:8) Usigenyo a buyogen ti panagkararag ti kalat iti amin-tiempo a serbisio itan iti kinaagtutuboyo. Tuladenyo ni Jesus babaen ti panagbiag iti nabatbati pay a paset ti panagbiagyo a “maipaay iti pagayatan ti Dios.” (1 Pedro 4:2) Agbalinto dayta a salaknibyo manipud kadagiti makadangran a nailubongan nga ambision, karera, ken pannakikuykuyog. Sukimatenyo dagiti kasasaadyo ket mangikeddeng iti espisipiko a petsa kas kalatyo a sumrek iti amin-tiempo a serbisio. Dayta ti pagreggetanyo a gun-oden. Ikararagyo ti tulong ni Jehova tapno magun-odanyo dayta.​—Efeso 6:18.

Ti panangpili ti panagpayunir kas kalatyo ket mabalin a mangiturong kadakayo kadagiti adu a nagsasayaat a pribilehio iti serbisio a nalablabes ngem ti namnamaenyo. Ti biagyo mapnonto iti ragsak, talged, ken ayat. Daytanto ti nakaragragsak, makapainteres, ken makapnek. Kangrunaanna, daytantot’ maysa a biag a makaay-ayo ken Jehova.​—Proverbio 27:11.