Ti Biag ken Ministerio ni Jesus
Ti Natangsit ken ti Napakumbaba
KALPASAN ti panangdakamatna kadagiti pagimbagan ni Juan a Mammautisar, inturong ni Jesus ti atensionna kadagiti natangsit, managbaliwbaliw a tattao nga adda iti aglawlaw. “Daytoy a kaputotan,” kunana, “maipadis kadagiti ubbing nga agtutugaw kadagiti plasa ket ik-ikkisanda dagiti kakaduada, a kunkunada, ‘Tinokarandakayo ti plauta, ket dikayo nagsala; indung-awandakayo, ket dikay nagladingit.’”
Aniat’ kayat a sawen ni Jesus? Inlawlawagna: “Nga immay ni Juan a di nangan ken di met uminum idi, ket kuna dagiti tattao, ‘Adda sairona’; immay toy Anak ti tao a mangan ken uminum, kaskasdi kuna dagiti tattao, ‘Adtoy! ti maysa a tao a mannangan ken managinum ti arak, pagayam dagiti agsingsingir ti buis ken dagiti managbasol.’”
Imposible ti panangpennek kadagiti tattao. Awan ti makaay-ayo kadakuada. Nagbiag ni Juan iti nakasimsimple a panagbiag iti panagsakripisio kas maysa a Nazareo, a maitunos ti kuna ti anghel a “saanto nga uminum ti arak ken inumen a naingel.” Kaskasdi kuna dagiti tattao nga isu adda demoniona. Iti kasumbangirna, nagbiag ni Jesus kas kadagiti dadduma a tattao, a dina inalagad ti aniaman a kinasimple, ket isu ti napabasol a managlablabes.
Anian a nagrigat nga ay-ayuen dagiti tattao! Maipadisda kadagiti agaayam a dadduma madida nga agsala idi a dagiti dadduma nga ubbing tinokaranda ida ti plauta wenno nagladingit idi isudat’ dinung-awan dagiti padada. Nupay kasta, kuna ni Jesus: “Ngem ti kinasirib mapaneknekan gapu kadagiti gapuananna.” Wen, ti pammaneknek—dagiti ar-aramid—pinagbalinna a nalawag a dagiti pammabasolda a maibusor kada Juan ken Jesus ulbodda.
Kalpasanna intuloy ni Jesus nga impuera a pananglais dagiti siudad ti Corazin, Betsaida, ken Capernaum, nga isut’ nangaramidanna iti kaaduan kadagiti nakaskasdaaw nga ar-aramidna. No inaramidna koma dagita kadagiti siudad ti Tiro ken Sidon idiay Fenecia, kuna ni Jesus, nagbabawi koma dagitoy a siudad iti cilicio ken dapo. Ti panangilunodna iti Capernaum, a kaawatan isu ti nagtaenganna bayat ti ministeriona, kuna ni Jesus: “Nalaglag-anto pay laeng ti dusa ti daga ti Sodoma ngem ti maipaay kenka iti Aldaw ti Pannakaukom.”
Aniat’ kayat a sawen ni Jesus iti daytoy? Nalawag ipakpakitana a, bayat ti Aldaw ti Pannakaukom inton dagiti natangsit idiay Capernaum mapagungarda, narigrigatto pay kadakuada nga admitiren dagiti biddutda ken awaten ti Kristo ngem kadagidiay mapagungar a taga Sodoma idi ugma nga agbabawi a sipapakumbaba ken adalen ti kinalinteg.
Sumaganad indaydayaw ni Jesus iti publiko ti nailangitan nga Amana. Isut’ natignay a mangaramid iti kasta agsipud ta inlemmeng ti Dios dagiti napapateg a naespirituan a kinapudno manipud kadagiti mamasirib ken mannakaawat ngem impanayagna dagiti nakaskasdaaw a bambanag kadagiti napakumbaba, kadagiti ub-ubbing, ti kaiyariganna.
Kamaudiananna, impaay ni Jesus ti makaallukoy a panangawis: “Umaykayo kaniak, dakayo amin nga agrigrigat ken madagdagsenan ta paginanaenkayto. Alaenyo ti sangolko kadakayo, ket agsursurokayo kaniak, ta siak naemmaak ken napakumbabaak ti panagpuspuso, ket makasarakkayto ti inana a maipaay kadagiti kararuayo. Ket ti sangolko nalaka ken nalag-an ti awitko.”
Kasano ti panangipaay ni Jesus ti inana? Aramidenna dayta babaen ti panangipaayna ti wayawaya manipud kadagiti makaadipen a tradision nga isu ti impabaklay dagiti narelihiusuan a papangulo kadagiti tattao, agraman kas pangarigan, dagiti makalapped unay a pagalagadan ti panangsalimetmet ti Panaginana. Kasta met, impakitana ti dalan nga agturong iti pakabang-aran kadagidiay mangrikna iti napalalo a kinadagsen ti panangdominar dagiti napolitikaan a turturay ken dagidiay madagdagsenan kadagiti basbasolda gapu iti maburiburan a konsiensiada. Impanayagna kadagita a madagdagsenan a ti basbasolda ti napakawan ken no kasano a tagiragsakendanto ti nasudi a pannakirelasion iti Dios.
Ti nalag-an a sangol nga ituktukon ni Jesus ket isu ti maysa a naan-anay a dedikasion iti Dios, a makapagserbi iti manangngaasi, managayat a nailangitan nga Amatayo. Ket ti nalag-an nga awit nga ituktukon ni Jesus kadagiti umay kenkuana ket isu ti panagtulnog kadagiti pagalagadan ti Dios a maipaay ti biag, dagiti bilbilinna, a pulos a saanda a makapadagsen. Mateo 11:16-30; Lucas 1:15; 7:31-35; 1 Juan 5:3.
◆ Kasano a ti kaputotan ni Jesus naipadis kadagiti ub-ubbing?
◆ Kasano a nalaglag-anto pay a maipaay iti Sodoma ngem iti Capernaum?
◆ Kadagiti ania a pamay-an a madagdagsenan dagiti tattao, ket ania a panangpalag-an ti intukon ni Jesus?