Report dagiti Manangiwaragawag ti Pagarian
Gunggona iti Kinamatalek
IDIAY idi Italia a, 15 años ti napalabasen, ni Mrs. B , a 15 añosna pay la idi ket naammuanna ti kinapudno. Nupay kasta, isut’ saan a rimmang-ay, gapuna isut’ nakiasawa iti maysa a di manamati. Dagiti bin-i ti kinapudno nagtalinaedda iti pusona, nupay kasta, ket agarup makatawen kalpasanna inawatna ti panangiyadal ti Biblia iti maysa kadagiti Saksi ni Jehova ket nangrugi a tumabuno kadagiti panaggigimong. Ni lakayna napalalo ti ibubusorna ket binutbutengna nga isut’ papanawenna iti balayda. Nakaro unay ti panangkabilna kenkuana a kinasapulanna ti medikal nga atension. Maysa a rabii ti lalaki ti bigla nga immuneg iti Kingdom Hall bayat iti maysa a gimong, kinabilna ti maysa a kabsat a lalaki, binuongna ti sarming ti ruangan, ket nagpukpukkaw a sipupungtot.
Idi ti babai nagsubli idiay balayda, nakitana a napunitanen ti ruangan. Situtured, napan iti estasion ti carabinieri (polis) tapno ipakaammo kadakuada no ania ti napasamak ket kalpasanna napan naturog idiay balay ti maysa nga ikitna. Kalpasan ti dua nga aldaw pinalubosan ni lakayna met laeng a makapagsubli iti balayda.
Ti asawa a lalaki pagaammoda unay iti ili. Rinugianna a linalais iti publiko dagiti Saksi ni Jehova, a kunkunana a dinadaelda ti pamiliana. Iti daytoy kontra kadagiti Saksi a kampania, isu ti sinuportaran dagiti klero. Maysa a padi ti nagpaipaskil kadagiti stickers nga addaan kadagitoy sumaganad a sasao: “KADAGITI SAKSI NI JEHOVA: Dikay rirriribuken ti talna daytoy a pamilia. PAGYAMANAN!” Impaipigketna dagitoy nga stickers kadagiti ruruangan iti intero nga ili. Tunggal maysa ti agsasao maipapan kadagiti Saksi ni Jehova ket pinagbalinda ida a puntiria ti pananglalais ken panangab-abida. Agpapan pay iti daytoy nagtalinaed a natured dagiti kakabsat ket nagtultuloyda nga ad-adda pay a naregregta iti ministerioda ngem idi damo. Kaaduan kadagiti pamilia saanda a kayat nga awaten dagiti stickers kadagiti ruruanganda. Sumagmamano nga ub-ubbing nga imbaon ti padi, naikkanda ti 100 lire iti inda panangipigket kadagitoy kadagiti ruruangan, kasta ti naipadamag.
Kabayatanna, pinakaammuan ni Mr. B—— ti baketna a masapul nga isut’ pumanaw iti balayda, ta isut’ nagtignayen a mangala iti legal a panagsinada. Ngem nangrugi nga agbalbaliw dagiti bambanag iti daytoy nga ili. Maysa a lokal nga estasion ti radio ti nangiparang iti maysa a programa, ket sinalaysay ti reporter ti kaso kas “maysa a maniobra a mapagduaduaan iti kasasaadna, iti nakababain a panagug-ugali.” Bayat ti programa, inlawlawag dagiti kakabsattayo nga adu kadagiti pamilia ti nakaipilitan dagiti stickers. Paneknekan daytoy ti kinapudno a dagitat’ naikabil kabayatan ti rabii uray pay iti sumagmamano a ruangan dagiti Saksi ni Jehova ken pamilia nga umaw-awat ti panagsarungkarda. Indaydayaw ti reporter ti radio dagiti Saksi ni Jehova ket kinunana a tattaoda “nga addaan kinadayaw, ket ti ug-ugalida ti mangipakpakita iti naan-anay a kinamanangngaasi.”
Kamaudiananna, immay ti tiempo para kadagiti agasawa nga agparang iti sanguanan ti hues tapno rugian ti legal a panagsina nga inkalikagum ti asawa a lalaki. Indaydayaw ti hues ni Mrs. B—— gaput’ tarigagayna a dida koma agsina, ket kabayatan ti panagur-urayna iti daytoy a darum, ti hues ti nangipaay iti asawa a babai ti panangaywan kadagiti annakda. Agtultuloyda nga agnaed iti pagtaenganda, ket ni lakayna ti mangted ken ni asawana ti 250,000 lire iti kada bulan. Simmuppiat ti asawa a lalaki, a kunkunana: “Ti balay ket kukua ni nanangko ket saan a mabalin nga agtalinaed ti asawak idiay.” Simmungbat ti hues: “Kayatmo ti agbalin nga asawa a lalaki ken amo. Ni baketmo ti kanayon nga agkuna ti wen, ket iti naminsan kinunana ti saan. Isut’ gapuna a ginulom ti intero nga ili. No koma ni baketmo ti di nagmatalek kenka, maawatak a kasta, ngem gapu iti kinapudno nga isut’ simmurot iti maysa a pammati imbes nga iti sabali daytat’ awan bibiangmo.”
Itan ni Mrs. B——siraragsaken nga agserserbi ken ni Jehova. (Mateo 5:10) Binalbaliwan dagiti tattao iti ili ti kababalinda, ket itan dagiti nakaskasdaaw a panagsasarita ti Biblia ti maar-aramiden. Immanamongda a saan a dagiti Saksi ni Jehova ti mangrirriribuk ti talna ti pamilia. No addada pay stickers kadagiti ruruangan, dagitat’ awanen ti aniaman kapapaayandan.